Թուրք-քրդական բախումները չեն դադարում

Թուրքիայի վարչապետ Թայիփ Էրդողանի հայտարարությունից հետո, թե իրենք պատրաստե են բանակցություններ վարել բանտում գտնվող «Քրդստանի աշխատավորական կուսակցության» (PKK) Աբդուլլահ Օջալանի հետ, այսօր հերթական կատաղի մարտերն են ընթացել Թուրքիայի զինված ուժերի և քրդական կազմակերպության միջև:

Թուրքական «Ռադիքալի» փոխանցմամբ` Թուրքիայի հարավ-արևելյան քրդաբնակ Հաքարի նահանգում արյունալի բախումներ են տեղի ունեցել թուրքական բանակի և PKK-ականների միջև:

Ըստ նախնական տեղեկությունների` թուրքական կողմը մեկ կորուստ ունի: Թուրքական աղբյուրները նշում են, որ քրդերը մի քանի սպանված են ունեցել:

Ներկայում դեպքի վայրում շարունակվում է փոխհրաձգությունը:

Հիշեցնենք, որ «Քրդստանի աշխատավորական կուսակցությունը» (Partiya Karkerên Kurdistan կամ PKK) քրդական մարքսիստական-լենինիստական ուղղվածության կազմակերպություն է, որի նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքների վրա Քրդստան անկախ պետության հիմնումը: Կազմակերպությունը հիմնադրվել է 1978 թվականին, Դիարբեքիրում (Աղձնիք նահանգ)՝ Աբդուլլահ Օջալանի (Ափո) կողմից, ով ներկայումս ցմահ ազատազրկում է կրում թուրքական Իմրալը կղզու բանտում:

Կազմակերպությունն ակտիվ ռազմական գործողություններն սկսել է 1984 թ.-ին: Թուրքական իշխանությունների դեմ մղվող շուրջ 30 տարվա պայքարի ընթացքում զոհվել է մոտ 45 հազար մարդ: PKK-ն ահաբեկչական կազմակերպությունների շարքին են դասում ԱՄՆ-ն, ԵՄ-ն, մի շարք այլ երկրներ:

http://haynews.am/hy/1348736688