Ցեղասպանության ժխտման վերաբերյալ նոր օրինագծի մասին Ֆրանսիայում որոշում չկա. Բաղըշ

Թուրքիայի ԵՄ հարցերով պետնախարար Էգեմեն Բաղըշն այսօր անդրադարձել է Ֆրանսիայի կողմից Ցեղասպանության ժխտումը դատապարտող նոր օրինագծի մշակման հավանականությանը:
 Ինչպես տեղեկացնում է Sondakika կայքը, Բաղըշն ասել է, թե Փարիզում Թուրքիայի դեսպանատունը հետևում է իրադարձությունների զարգացմանը:
 Բաղըշը պնդել է, թե դեռևս նոր օրինագծի վերաբերյալ որևէ որոշում չկա:
 Հիշեցնենք, որ օրերս Ֆրանսիայի խորհրդարանում Հայոց ցեղասպանության ժխտումը քրեականացնող օրինագծի աջակիցներից պատգամավոր Վալերի Բուայեն հայերին խոստացել էր նոր օրինագիծ ներկայացնել:

«Առայժմ հետևում ենք, թե նախագահ Ֆրանսուա Օլանդը կկատարի՞ խոստումը, թե՞ ոչ: Նա հայտարարել էր, որ օրինագիծն օրակարգ է մտցնելու, սակայն այսօր Թուրքիայի հանդեպ այլ քաղաքականություն է վարում»,- ասել էր Բուայեն:

 Ցեղասպանության քրեականացման մասին օրինագիծն ընդունվել էր Ֆրանսիայի Սենատի կողմից, սակայն երկրի Սահմանադրական խորհուրդն այն հակասահմանադրական էր ճանաչել:

 Ֆրանսիայի գործող նախագահ Ֆրանսուա Օլանդը նախընտրական քարոզարշավի ընթացքում խոստացել էր Ցեղասպանության ժխտումը քրեականացնող նոր օրենք ընդունել:

http://tert.am/am/news/2012/09/25/bagsh-genocide/