Դերսիմահայերը տարիներ անց դարձյալ աղոթքով կմեկտեղվեն

Սեպտեմբերի 29-ին Դերսիմի հայերը կմեկտեղվեն Ֆրանկֆուրտից 20 կմ հեռավորության վրա գտնվող Հանաու քաղաքում: Միջոցառմանը կմասնակցի նաև Գերմանիայում հայերի հոգևոր առաջնորդ, արքեպիսկոպոս Գարեգին Բեքչյանն ու հայր Սերոբվե Իսախանյանը: Դերսիմահայերը  տարիներ անց դարձյալ աղոթքով կմեկտեղվեն:

Դերսիմի հայերի հավատքի և սոցիալական փոխօգնության միության նախագահ Միհրան Փրկիչ Գյուլթեքինը «Ակունք»-ի հետ զրույցում տեղեկություններ է հաղորդել Հանաու քաղաքում կայանալիք միջոցառման մասին.

«Դերսիմի հայերի ձայնն արդեն սկսել է լսվել նաև Եվրոպայից: Իրոք սա ավելին էր, քան սպասում էի: Այսինքն` այնտեղի մեր ընկերերի նախաձեռնությունը, ներդրումն ու համակարգված աշխատանքներն ինձ բավականին ոգևորեցին: Ֆրանկֆուրտում առաջին անգամ կազմակերպվող մեր այս միջոցառման արձագանքներն ինձ հուշում են, որ դրանք շարունակվելու են Եվրոպայի տարբեր շրջաններում: Ասում են, որ Բեռլինում ավելի հիանալի միջոցառում են կազմակերպելու: Ես գիտեմ, որ այն, ինչ անում ենք, մեծ աղմուկ է բարձրացնելու: Դերսիմը գրավում է և’ Եվրոպայի, և’ հայերի ուշադրությունը, քանի որ փակ տուփի նման մի շրջան է: Այսօր դեռևս ոչ մի հետազոտող մուտք չի գործել Դերսիմ, որևէ ուսումնասիրություն չի կատարել այնտեղ. ոչ մեկը տեղյակ չէ դերսիմաբնակ հայերի մասին: Եվ դա էլ հետաքրքրության տեղիք է տալիս: Այդ իսկ պատճառով Եվրոպայում ընկերները, մեծ արձագանքներ ստանալով, ոգևորվել և ձեռնամուխ են եղել նման միջոցառումների կազմկերպմանը»:

Գյուլթեքինը խոսել է նաև միության` մինչ օրս ծավալած գործունեության և հետագա անելիքների մասին. «Սրանից հետո ժամանակ առ ժամանակ շարունակելու ենք տպագրական աշխատանքները: Օրինակ` շարունակելու ենք լույս ընծայել մեր ամսագիրը: Արդեն տպագրել ենք չորս համար և հատուկ հավելված: Բոլորն անվճար ենք բաժանում: Բնականաբար, հեշտ չէ, սակայն ցանկանում ենք կատարել: Ըստ էության, միշտ էլ սիրել եմ անվճար գրքեր բաժանել: Երբեք չեմ սիրել գիրք վաճառել:

Դերսիմի փառատոնի ժամանակ էլ եմ այդպես վարվել: Փառատոնին Դերսիմի քաղաքապետարանի գրադարանին անվճար հանձնել եմ Հայոց ցեղասպանության մասին գրքեր: Ընկերները շնորհակալություն հայտնեցին: Լոկ ցանկանում եմ, որ կարդան, միայն այդպես կհետաքրքրվեն: Միայն կարդալուց հետո կարող են մեզ օգտակար լինել: Բացի այդ, ցանկանում ենք Հայաստանում Դերսիմի վերաբերյալ լույս տեսած գրքերը կամաց-կամաց թարգմանել թուրքերեն և ներկայացնել մարդկանց ուշադրությանը»:

Գյուլթեքինը շարունակելով խոսել Դերսիմի հայերի միության հետագա անելիքների մասին` ասաց. «Այլևս ցանկանում ենք հնձել այն, ինչ ցանել ենք: Ուզում ենք փոփոխություններ տեսնել: Ուզում ենք, որ Դերսիմի հայերն, ովքեր գիտեն իրենց ինքնության մասին և ընդունում են այն, կիրառեն պրակտիկայում: Գոնե ուզում ենք, որ այսուհետ իրենց ավանդույթները, հարսանիքները նմանեցնեն, համապատսխանեցնեն հայերի հարսանիքներին, ամուսնություններից հետո ծնված երեխաներին հայկական անուններ դնեն: Առաջիկա 50 տարվա ընթացքում Դերսիմում անահիտներ, հրանտներ, միհրաններ, հակոբներ կսկսեն երևալ: Այսուհետ փորձելու ենք սա իրականցնել»:

Գյուլթեքինն անդրադարձավ նաև Պոլսո հայոց պատրիարքարանի վերաբերյալ իր անհանգստություններին. «Պատրիարքարանի դիրքորոշումը կարծես նման լինի պետական մտայնությանը: Հայ լինել ցանկացող մարդկանց համար շատ խիստ գործընթաց է դրված: Բնականաբար, սա դժվարացնում է գործը: Այսօրվա պայմաններում մարդկանց համար դժվար է 6 ամիս եկեղեցու դասընթաց անցնել, հատկապես դժվար է Դերսիմում ապրողների համար: Սա մի փոքր հետ է պահում նրանց: Ժամանակ չեն կարողանում գտնել, ամեն տեղ էլ եկեղեցի չկա: Այսինքն` եթե Դերսիմում մեկը նման քայլ ցանկանա կատարել, եկեղեցու վեցամսյա դասընթաց անցնելու համար Ստամբու՞լ է գալու: Անհրաժեշտ է կարգավորել այս անհավասարակշիռ իրավիճակը»:

 Անահիտ Քարտաշյան/Ստամբուլ

Akunq.net