ՀՀ կրթության եւ գիտության նախարար Արմեն Աշոտյանն ընդունել է Գերմանիայի Դաշնային Հանրապետության Սաքսոնիա-Անհալթ երկրամասի մշակույթի եւ կրթության նախարար Շտեֆան Դորգերլոհի գլխավորած պատվիրակությանը:
Հանդիպման ընթացքում նախարար Արմեն Աշոտյանը տեղեկացրել է, որ Հայոց ցեղասպանության 100-րդ տարելիցին ընդառաջ մի շարք գործընկերների հետ մշակվել է գաղափար` եվրոպական դպրոցական ծրագրերում Հայոց ցեղասպանության վերաբերյալ դասընթացներ ներառելու ուղղությամբ:
Ա. Աշոտյանը, անդրադառնալով գործընթացի նպատակին, ասել է, որ անհրաժեշտ է Եվրոպայի երիտասարդ սերնդին պատմել 20-րդ դարի մեծագույն ոճիրներից մեկի մասին եւ կանխարգելել ու բացառել հետագայում նման հանցագործությունների կրկնությունը. «Որոշ եվրոպական երկրներ արդեն իսկ ցեղասպանության մասին նյութերը ներառել են հանրակրթական ծրագրերում: Հաշվի առնելով, որ տարիներ առաջ Գերմանիայի Բունդեսթագը տվել է իր քաղաքական գնահատականը նշված իրադարձությունների վերաբերյալ, կարծում եմ` հարկ է երկրի քաղաքական դիրքորոշումը փոխանցել նաեւ երիտասարդ սերնդին»:
Իսկ Շտեֆան Դորգերլոհը դրական է գնահատել նշված նախաձեռնությունը. «Հարեւան Բրանդենբուրգի երկրամասում արդեն օժանդակ ուսումնական նյութեր են պատրաստվել, որտեղ մարդկության դեմ նմանատիպ այլ ոճիրների շարքում հանգամանալից ներկայացված է նաեւ Հայոց ցեղասպանությունը»:
Շտեֆան Դորգերլոհը նշել է նաեւ, որ նշված քայլերը ոչ միայն հիշեցնում են ապագա սերունդներին վերոնշյալ ոճրագործությունների մասին, այլ նաեւ նպաստում են ժողովուրդների երկխոսությանը եւ հաշտեցմանը` որպես օրինակ բերելով գերմանա-ֆրանսիական հաշտեցման պայմանագիրը:
http://azg.am/AM/2012092508
Leave a Reply