Հայոց ցեղասպանության հարյուրամյակին նվիրված միջոցառումները հաստատվել են

Հայոց ցեղասպանության հարյուրամյա տարելիցին նվիրված միջոցառումները համակարգող պետական հանձնաժողովի երկրորդ նիստը կայացավ սեպտեմբերի 20-ին: «Արմենպրես»-ի հաղորդմամբ` հանձնաժողովի քարտուղար Հայկ Դեմոյանը լրագրողների հետ հանդիպմանը նշեց, որ օրակարգային հարցերն են եղել միջոցառումների անցկացման ռազմավարությունը, 2013 եւ 2015 թթ. համար առաջարկություններ են ներկայացվել, հիմնական նպատակը, սակայն, եղել է 2013-ի միջոցառումների հայեցակարգի հաստատումը:
Դեմոյանի խոսքով` քննարկման է դրված եղել նաեւ հանձնաժողովի առանձնանշանի` լոգոյի եւ կարգախոսի հարցը: Կարեւորվել է նաեւ հանձնաժողովի պաշտոնական կայքի գործարկումը: Դեմոյանի փոխանցմամբ` կայքը որոշվել է մեկնարկային 7 լեզուներով թողարկել այս տարի` առանց հապաղելու: Ֆինանսական կարգավորման խնդիրները եւս հանձնաժողովի նիստի օրակարգում են եղել: Քննարկվել է պետական հանձնաժողովին կից ստեղծված փորձագիտական խմբի գործունեությունը ֆինանսավորելու, ծախսերը հոգալու հարցը: Նշված խումբը եւս օրակարգային է եղել: Խմբում ընդգրկվելու համար ներկայացված էր 25 անուն. նրանք անձինք են, ովքեր ունեն լուրջ ավանդ Հայոց ցեղասպանության ուսումնասիրության ոլորտում, որոշվել է նաեւ յուրաքանչյուր տարի ՀՀ Նախագահի կողմից սահմանված մրցանակն իբրեւ սկզբունք ընդունել: «Հայոց ցեղասպանության միջազգային ճանաչման ոլորտում ավանդ ներդրած» անձանց համար առանձին անվանակարգ է սահմանված, մրցանակի արժանացողներն ինքնաբերաբար կդառնան փորձագիտական խմբի անդամ:
Հանձնաժողովի խնդիրն է եղել ճշգրտել` հաջորդ տարի երբ պետք է տեղի ունենա 3-րդ նիստը: Որոշվել է այն կազմակերպել մայիսյան տոնակատարությունների նախօրեին: Այդ ընթացքում, սակայն, հանձնաժողովն իր աշխատանքը չի դադարեցնելու: Այն շարունակելու է իր կարեւորագույն գործառույթներից մեկը` նպաստել տեղերում` համայնքներում, ՀՀ դիվանագիտական ներկայացուցիչների եւ համայնքային կառույցների համադրված ջանքերով տեղական հանձնաժողովների ստեղծման աշխատանքներին: Նիստում ներկայացվել է քարտուղարության հաշվետվությունը, թե ինչպես եւ ինչ կարգի աշխատանք է կատարվել, որ երկրներում են արդեն գործում տեղական հանձնաժողովներ: Դեմոյանի խոսքով` արդեն իսկ կան շահավետ փոխհամագործակցության դրական արդյունքներ: Որպես օրինակ Դեմոյանը նշեց Լիբանանի կենտրոնական հանձնախումբը, որն այս տարի արդեն կարողացել է կազմակերպել երկու խոշոր միջոցառում` կապված հարյուրամյա տարելիցի հետ: Տարին, սակայն, ավարտված չէ. աշնանը նախատեսվում են եւս երկու-երեք խոշոր միջոցառումներ Եվրոպական երկրներում ստեղծված հանձնաժողովների հետ:

http://armenpress.am/arm/news/693837/hayoc-cexaspanutyan-haryuramyakin-nvirvats-mijocarumnery.html