Թուրքական Haberturk պարբերականի սյունակագիր Ամբերին Զամանը խիստ քննադատական հրապարակում է ներկայացրել` Հունգարիայի կողմից հայ սպա Գուրգեն Մարգարյանին կացնահարած եւ ցմահ ազատազրկման դատապարտված Ռամիլ Սաֆարովի արտահանձնման եւ Ադրբեջանում նրա հերոսացման հետ կապված:
NEWS.am–ը ներկայացնում է Ամբերին Զամանի «Ադրբեջանական արդարություն. Հարվածի’ր կացնով եւ կոչումդ կբարձրանա» վերնագրով հրապարակումից մի հատված:
«Ադրբեջանցի սպա Ռամիլ Սաֆարովի հետ հենց այդպես էլ եղավ: Նա 8 տարի առաջ ՆԱՏՕ-ի կողմից կազմակերպված անգլերենի դասընթացի էր մասնակցում: Նա գնեց կացին եւ նույն դասընթացին մասնակցող հայ սպա Գուրգեն Մարգարյանին քնած ժամանակ կացնով սպանեց:
Դատավարության արդյունքում Սաֆարովը ցմահ ազատազրկման դատապարտվեց: Նա վերջերս հունգարական իշխանությունների կողմից հանձնվեց Ադրբեջանին: Եւ երկիր մտնելուն պես այդ հանցագործին որպես ազգային հերոս են դիմավորում: Փողոցները լցված ժողովուրդն իր սերը ցույց տվեց Սաֆարովի նկատմամբ, իսկ պետությունը նրան նվիրեց բնակարան, տվեց 8 տարվա աշխատավարձ եւ բարձրացրեց նրա զինվորական կոչումը:
Այդ «փառահեղ» վերադարձի համար վաղուց էր հող նախապատրաստվել: Ադրբեջանի պետական լրատվամիջոցների պնդմամբ՝ Մարգարյանն անարգել էր Ադրբեջանի դրոշը: Սակայն հունգարական դատարանում այդ մասին որեւէ ապացույց չներկայացվեց:
Որ կողմից էլ նայես, կացնահարվեց ոչ միայն Մարգարյանը, այլ նաեւ միջազգային իրավունքը: Ըստ շրջանառվող լուրերի՝ պարտքերի մեջ խեղդվող հունգարական կառավարությունն Ադրբեջանից տարբեր շահեր էր ապահովել: Դրանցից գլխավորն այն էր, որ Ադրբեջանը 3 միլիարդով գնել էր հունգարական պետական արժեթղթերը:
Այդ սկանդալային որոշման հետեւանքով հունգարական կառավարությունը ենթարկվեց Եվրախորհդարանի եւ այլոց մեղադրանքներին: Հայաստանը խզեց Հունգարիայի հետ հարաբերությունները:
Մի բարձրաստիճան հայ դիվանագետ ինձ հետ հանդիպման ժամանակ նշեց, որ նման որոշումից հետո հայերը մեկ առ մեկ թիրախ են դարձել: Այս որոշման ուղերձը հետեւյալն է. «Խփի’ր հային, կոչումդ կբարձրացվի»: Այս սկանդալի մյուս զոհը Մինսկի խմբի միջնորդությամբ ընթացող Ղարաբաղի հարցով բանակցություններն են»,-գրել է Haberturk-ի սյունակագիրը:
Leave a Reply