Հայոց պահանջատիրության դեմ առաջին թուրքական հուշարձանը արտերկրում

Թուրքական «Հյուրրիյեթ» (Hürriyet) օրաթերթի տեղեկացմամբ` Թուրքիայի արտգործնախարար Ահմեթ Դավութօղլուն մեկնել է Կանադա` մասնակցելու 30 տարի առաջ ASALA-ի վրիժառուների  կողմից սպանված թուրք դիվանագետ, դեսպանության ռազմական կցորդ, գնդապետ Աթիլլա Ալթըքաթի հուշարձանի բացման արարողությանը:

Նշվում է, որ դրա կառուցման ծրագիրը շուրջ 1 տարի գաղտնի է պահվել հայերից: Թուրքերը մտավախություն են ունեցել, որ հայկական լոբբիստական ուժերը կարող են տապալել հուշարձանի կառուցման ծրագիրը: Գործընթացին լայն աջակցություն է ցուցաբերել Թուրքիան: Այնտեղ է պատրաստվել հուշարձանը և մաս-մաս տեղափոխել Կանադա` գաղտագողի և ծածուկ: Հուշարձանի ճարտարապետ Նեջմեթթին Յաղջըն ընդգծել է, որ արտերկրում հայերի հակաթուրքական տասնյակ քարե կոթողների դիմաց դա առաջին պատասխան արձանը կլինի թուրքերի կողմից: 

Հուշարձանի բացումը կատարելուց հետո Դավութօղլուն հանդիպում է ունենալու Կանադայի իր պաշտոնակցի հետ և քննարկելու երկկողմ հարաբերությունների զարգացման հեռանկարը:

Հիշեցնենք, որ ASALA-ն (Հայաստանի ազատագրության հայ գաղտնի բանակ – Armenian Secret Army for the Liberation of Armenia) 1980-ականներին դարձել էր հայոց պայքարի ու վրեժի խորհրդանիշը: ԱՍԱԼԱ-ն պայքարում էր ոչ միայն զենքով, այլև ուներ իր պաշտոնաթերթը` «Հայաստանը», որ լույս էր տեսնում հինգ լեզուներով` հայերեն, անգլերեն, արաբերեն, ֆրանսերեն և թուրքերեն: 10 տարվա ընթացքում ԱՍԱԼԱ-ի զինյալներն իրականացրեցին ավելի քան 200 հարձակում թուրք դիվանագետների և քաղաքական գործիչների դեմ աշխարհի տարբեր երկրներում: Այդ տարիներին թուրքական կառավարությունը գնաց ծայրահեղ քայլի. Անկարան սկսեց իր արտակարգ և լիազոր դեսպաններին զինել և հատկացնել զրահապատ մեքենաներ: 1990-ականների սկզբին ԱՍԱԼԱ-ն ընդհատակ անցավ, բայց երբեք չի հայտարարել իր գործունեությունը կասեցնելու մասին: 

http://ermenihaber.am/?lang_id=2&news_=4&cur_news=201