Թուրքիայի Բիթլիս (Բաղեշ-Ակունքի խմբ.) նահանգի պաշտոնյաների կողմից Վանա լճի անունը Թաթվանի ծով, Ահլաթի լիճ կամ Բիթլիս-Վանի լիճ անվանելու առաջարկները խիստ անհանգստացրել են Վանի փոխքաղաքապետին եւ Վան նահանգի այլ պաշտոնյաների:
Թուրքական Sabah-ի փոխանցմամբ՝ Վանի փոխքաղաքապետ Սաբրի Աբին հայտարարել է, թե շատ սխալ է Վանա լճի անունը դնել Թաթվանի ծով կամ բիթլիսցիների առաջարկած մյուս անունները, քանի որ հնուց ի վեր լճի անունը հայտնի է որպես Վանա լիճ, եւ բոլոր զբոսաշրջիկները գալիս են տեսնելու հենց Վանա լիճը: Նա կոչ է արել Բիթլիս նահանգի պաշտոնյաներին՝ Վանա լճի անունը փոխելու փոխարեն Վանա լճի պահպանությամբ զբաղվել:
Վանա լճի եւ շրջակայքի պահպանության վարչության պետ Ալի Չավդարը եւս հակադարձել է բիթլիսցիներին՝ հիշեցնելով, որ ամենակեղտոտ ափերը գտնվում են Բիլթլիսի նահանգում, իսկ բիթլիսցիներն այն պահպանելու փոխարեն անունն են ուզում փոխել:
Նշենք, որ Թուրքիայի մշակույթի եւ տուրզիմի նախարարի՝ Բիթլիս նահանգ կատարած այցի ժամանակ նրան առաջարկել են Վանա լճի անունը փոխել, որին նախարարը դրական է պատասխանել: Բիթլիսի պաշտոնյաների պատճառաբանությունն այն է, թե օսմանական արխիվներից մեկում Վանա լճի անունը նշված է որպես Թաթվանի ծով:
Հիշեցնենք, որ Վանա լճի ջրերը գտնվում են Վան եւ Բիթլիս նահանգներում:
Leave a Reply