Թուրքիայի ազգային կրթության նախարարությունն առաջին անգամ կօգտվի քրիստոնյա հոգևորականների աջակցությունից

Թուրքիայի ազգային կրթության նախարարությունը դասագիրք կազմելու հարցում առաջին անգամ քրիստոնյա հոգևորականների աջակցությունն է հայցում: Թուրքական լրատվամիջոցների հաղորդմամբ` «Կրոնական հիմունքներն» ընտրովի դասընթաց է դարձել թուրքական դպրոցներում: Սույն դասընթացներում հուդայիզմի հետ մեկտեղ ներառվել է նաև քրիստոնեությունը: Սակայն առայժմ որևէ դասագիրք գոյություն չունի:

Դասագիրք պատրաստելու գործում համակարգող է նշանակվել Մարմարա համալսարանի Աստվածաբանության ֆակուլտետում դասավանդող` քրիստոնեության մասնագետ, դոկտոր, պրոֆեսոր Ֆարուք Հարմանը, ով անցյալ շաբաթ հանդիպում է ունեցել բողոքական եկեղեցու հովիվներ Բեհնան Քոնուքքանի և Իսա Քարաթաշի, Պոլսո հայոց պատրիարքարանի եպիսկոպոս Սահակ Մաշալյանի և Յեշիլքյոյի հայկական եկեղեցու հոգևորական Դրդատ  Ուզունյանի, ասորական ուղղափառ եկեղեցու ներկայացուցիչ Զեքի Դեմիրի և Ֆեների հունաց ուղղափառ պատրիարքարանի ներկայացուցիչ երկու հոգևորակաների հետ: Սեպտեմբերի 24-ին նախատեսվում է նրանց երկրորդ հանդիպումը, որից հետո գիրքը կազմելու նպատակով կհիմնվի մի հանձնաժողով, որը բաղկացած կլինի քրիստոնյա հոգևորականներից և գիտնականներից:

Գրքում տեղ կգտնեն այնպիսի թեմաներ, ինչպիսիք են` քրիստոնեության ծնունդը, Հիսուս Քրիստոսի ծնունդը և գործունեությունը, Սուրբ գիրքը և այլն:

Սա աննախադեպ իրադարձություն է Թուրքիայի ազգային կրթության նախարարության պատմության մեջ, որը դասագիրք կազմելու համար դիմում է քրիստոնյա հոգևորականների օգնությանը: Հրեաներն էլ նույն աշխատանքը կանեն, եթե նման պահանջ առաջանա:

Akunq.net