Հայոց ցեղասպանության ճանաչումը Թուրքիայի` ԵՄ անդամակցության նախապայմանն է. Մարտին Շուլց

Գերմանիայի «Ձախերի կուսակցություն»-ը ողջունում է Եվրախորհրդարանի դիրքորոշումը, համաձայն որի` Հայոց ցեղասպանության ճանաչումը դիտվում է որպես նախապայման Թուրքիայի` Եվրամիությանն անդամակցության համար:

Այս մասին հաղորդում է «Արմենպրես»-ը` վկայակոչելով Գերմանիայի «Ձախերի կուսակցության» պաշտոնական կայքը, որտեղ զետեղված հոդվածում ընդգծվում է Եվրախորհրդարանի նախագահ Մարտին Շուլցի այն հայտարարությունը, որ Թուրքիան պետք է առերեսվի պատմությունը:

Եվրախորհրդարանի նախագահ Մարտին Շուլցն այս մասին ընդգծել է Թուրքիայի պետնախարար և Եվրամիությանն անդամակցության բանակցություններում գլխավոր բանագնաց Էգեմեն Բաղըշի հետ հանդիպման ժամանակ: Նրանք խոսել են Սիրիայում Թուրքիայի պաշտոնական դերի, վիզային խնդիրների եւ Եվրամիությանը Թուրքիայի հնարավոր անդամակցության մասին:

Նրանք իրենց քննարկումների առանցքում են պահել նաեւ Հայոց ցեղասպանության հարցը, ինչպես նաեւ ֆրանսիական Սենատի կողմից այդ հարցի առնչությամբ նախաձեռնված նոր օրինագիծը:

Եվրախորհրդարանում լրագրողների հետ հանդիպման ժամանակ Բաղըշը, սակայն, Հայոց ցեղասպանության առնչությամբ Շվեյցարիայում արտահայտած իր տեսակետերի եւ դրանց հետեւած վերլուծությունների մասին հարցին չի պատասխանել: Բաղըշն ասել է, թե Շվեյցարիան Եվրամիության անդամ չէ, եւ «ես ոչ մի վայրկյան չեմ տրամադրի Եվրամիությանը չառնչվող հանգամանքների մասին խոսելու»:

Մարտին Շուլցն իր հերթին ընդգծել է Եվրախորհրդարանի հստակ դիրքորոշումը, համաձայն որի` ընդունված բանաձեւով դեռ 2005թ. կոչ է արվում, «որպեսզի Թուրքիան ճանաչի Հայոց ցեղասպանությունը, եւ դա կդիտվի որպես նախապայման Եվրոպական միություն մուտք գործելու համար»:

Գերմանական «Ձախերի կուսակցություն»-ն իր կայքում զետեղած այս տեղեկատվությանն ավելացրել է նաեւ սեփական դիրքորոշումը`ողջունելով այդ հայտարարությունը:

http://armenpress.am/arm/news/693413/hayoc-cexaspanutyan-tchanachumy-turqiayi-em-andamakcutyan.html