Թուրքիան կճանաչի Ցեղասպանությունը, երբ կարողանա նայել սեփական «արյունոտ» պատմությանը. Արսինե Խանջյան

Թուրքիան կճանաչի Հայոց ցեղասպանությունն այն ժամանակ, երբ կարողանա իր մեջ ուժ գտնել եւ նայել սեփական «արյունոտ» պատմությանը, երբ գիտակցի, որ իրենց արածը ոճիր է եղել: Անհրաժեշտ է նաեւ, որ թուրք հասարակությունը սկսի իրեն հարց տալ` ով եմ ես իրականում` ամեն լավ եւ վատ հատկանիշներով, գենետիկ հիշողությամբ: «Արմենպրես»-ի հետ զրույցում այդ մասին նշեց կանադահայ հանրահայտ դերասանուհի եւ պրոդյուսեր Արսինե Խանջյանը: Նրա խոսքով` այդ ամենն իրականություն կդառնա այն ժամանակ, երբ հստակ պարզաբանումներ պահանջվեն նրանցից, երբ Թուրքիայում սկսեն ճնշումներ գործադրել հենց թուրքերը:

«Նրանք պետք է հասկանան, որ այդքան տարի ապրել են ստի մեջ, երբ յուրաքանչյուրը զգա, որ իրենց ընտանիքում թաքնված է «հանցագործության» մի մասնիկը, որ իր պապը եղել է 1915 թ.-ի ոճիրն իրականացնողներից մեկը»,- ասաց Արսինե Խանջյանը: Դերասանուհին վստահ է` հերքման քաղաքականությունը ի վնաս նրանց է եւ ներկայիս սերնդի: «Հենց այդ ժխտողականությունը դարձնում է նրանց շարունակվող հանցագործության մի մասնիկ»,- ասաց դերասանուհին: Հայաստանը պետք է մեծ ուշադրություն դարձնի Թուրքիայում ապրող հայերին` կապ չունի նրանք դեռ քրիստոնյա են, թե բռնի ուժով մահմեդականացված: Նրանք պետք է միանան Թուրքիայում ապրող այլ փոքրամասնություններին եւ հստակ գործողություններ իրականացնեն: «Ես հույս ունեմ, որ այդ ճանապարհով մենք արդյունքի կհասնենք: Գոնե հույս ունեմ»,- ասաց նա:

Դերասանուհին այս հարցում կարեւորում է նաեւ միջազգային հանրության դերը: «Միջազգային հանրությունն այնքան պատասխանատու է ժխտման գործում, որքան Թուրքիան: Միջազգային հանրությունը պետք է դադարեցնի այս հարցի շուրջ քննարկումները, բանավեճերը, պետք է այս հարցին նայի առանց քաղաքական շահի»,- նշեց դերասանուհին` շեշտելով, որ ոչ միայն հայությունը պետք է գոչի դրա մասին, այլեւ` դաշնակիցները: Նրա խոսքով` թեեւ Հոլոքոստն ընդունվել է գերմանացիների կողմից, սակայն թուքերը դեռեւս ուժ չեն գտնում իրենց մեջ ընդունելու իրողությունը: Պատճառը մեկն է` Թուրքիայի ներսում պակասում է քաղաքակիրթ հասարակությունը: «Մարդիկ երբեք չեն մոռանում ոճիրը, սպանդը: Հայաստանի եւ Թուրքիայի ապագա սերունդները միշտ էլ բախվելու են իրենց երկրների այս պատմությանը, եւ այն երբեք չի մոռացվի: Եվ միջազգային կառույցները հանուն Թերքիայի ու Հայաստանի սերունդների պետք է ճնշում գործադրեն այս հարցը լուծելու համար»,- ասաց նա:

Հայոց ցեղասպանության (Մեծ Եղեռն, անգլերեն՝ Armenian Genocide)` Թուրքիայի կառավարող ուժերի կողմից կազմակերպված սպանդի արդյունքում 1892-1923 թթ. զանգվածային տեղահանության է ենթարկվել, և բնաջնջվել Արևմտյան Հայաստանի, Կիլիկիայի և Օսմանյան կայսրության նահանգների ավելի քան 1,5 միլիոն հայ բնակչություն։ Պայմանականորեն Ցեղասպանության սկիզբն է համարվում 1915 թ. ապրիլի 24-ը, երբ Կոստանդնուպոլսում ձերբակալվեցին, ապա կոտորվեցին 600 հայազգի մտավորականներ։

http://armenpress.am/arm/news/693347/