Հրանտ Դինքի սպանությունը հրահրողը, հնարավոր է, ազատ արձակվի

Թուրքիայի հայ լրագրող Հրանտ Դինքի սպանությունը հրահրած և ցմահ ազատազրկման դատապարտված Յասին Հայալը 4 ամսից կարող է ազատ արձակվել՝ օրենսդրության մեջ առկա բացի պատճառով, հայտնում է Hürriyet-ը՝ հղում կատարելով Դինք ընտանիքի փաստաբան Ֆեթհիհե Չեթինի հայտարարությանը, ով նախօրեին Երևանում էր:

«Ակօս» թերթի հաղորդմամբ՝ խնդիրն այն է, որ Դինքի սպանության գործով վճիռներ կայացրած դատարանը հավուր պատշաճի նյութերը չի ուղարկել Գերագույն վճռաբեկ դատարան, որի վճռից հետո միայն կհաստատվեր դատավճիռը: Իսկ Թուրքիայի Քրեական օրենսգրքի վերջին շտկումները մեղադրյալների համար բանտում անցկացվելիք առավելագույն ժամկետ են սահմանել 5 տարին (բացառությամբ կազմակերպված հանցավորության կամ ահաբեկչության համար մեղադրվողների)՝ թույլ տալով Գերագույն վճռաբեկ դատարանին այդ ժամկետն ավելացնել ևս 1 տարով:

Ժամանակին իր որոշման մեջ թուրքական դատարանը վիճարկել էր այն, որ հանցագործությունը դավադրության բնույթ ունի՝ հրահրված է: Այնուհետև հանցագործության կազմակերպված լինելու բնույթը վիճարկել էր նաև դատախազը: Ըստ այդմ՝ Դինքի սպանությունը կարող է ճանաչվել ոչ կազմակերպված, ինչը թույլ է տալիս Հայալին բանտում անցկացրած 5 տարիներից հետո ազատ արձակվել:

«Ակօս» թերթի խմբագիր Հրանտ Դինքը սպանվել էր 2007 թ. հունվարին: Սպանությունը հրահրող Յասին Հայալը դատապարտվել էր ցմահ, իսկ մարդասպան Օգյուն Սամաստը՝ 22 տարվա ազատազրկման:

http://tert.am/am/news/2012/09/14/dink-instigator-releasing/