Թուրքիայի դեսպանն Արեւմուտքին սպառնացել է նոր Ռամիլ Սաֆարովով

Ադրբեջանում Թուրքիայի դեսպան Հուլուսի Քըլըչը, ով դինավագիտական առաքելության ժամկետն ավարտվելու առնչությամբ հանդիպումներ է անցկացնում Բաքվում, Արեւմուտքին սպառնացել է նոր ռամիլ սաֆարովներով:

Ինչպես հաղորդում է «Արմենպրես»–ը` վկայակոչելով ադրբեջանական haqqin.az լրատվական կայքը, հակառակվելով Հունգարիայից արտահանձնվելուց հետո Ադրբեջանի նախագահի կողմից մարդասպան Սաֆարովին ազատ արձակելու հարցում միջազգային հանրության, աշխարհի առաջատար երկրների ղեկավարների, Եվրոպայի խորհրդի հնչեցրած քննադատություններին եւ դատապարտումներին, Ադրբեջանի մամուլի ներկայացուցիչների հետ հանդիպման ժամանակ թուրք դեսպանն ասել է, թե «եթե Արեւմուտքը չի ուզում Սաֆարովի հետ տեղի ունեցածի հերթական կրկնությունը, պետք է շտապ կերպով լուծի Լեռնային Ղարաբաղի խնդիրը»: Քըլըչը հայտարարել է, թե Թուրքիան մշտապես պաշտպանել է Ադրբեջանի «արդարացի պայքարը»: Թուրք դեսպանը նաեւ խոստացել է իր «հետագա գործունեության ընթացքում ուժեր չխնայել ԼՂ հարցում Ադրբեջանին աջակցելու համար»:

Ադրբեջանցի ոճրագործ սպա Ռամիլ Սաֆարովը 2004 թ-ին Բուդապեշտում կազմակերպված անգլերենի դասընթացների ընթացքում քնած ժամանակ կացնի 16 հարվածներով սպանել է հայ սպա Գուրգեն Մարգարյանին: Հունգարիայի դատարանը ցմահ բանտարկության է դատապարտել Սաֆարովին` պատիժը 30 տարի չվերանայելու պայմանով: 2012 թ-ի օգոստոսի 31-ին Սաֆարովն արտահանձնվել է Ադրբեջան` պատիժն այնտեղ կրելու պայմանով, սակայն, այդ երկրի նախագահը ներում է շնորհել եւ ազատ արձակել նրան:

http://armenpress.am/arm/news/693204/turqiayi-despann-arevmutqin-sparnacel-e-nor-ramil-safarovov.html