«Հասան Ջեմալը հայկական սփյուռքի սպասավորն է Թուրքիայում»

Հ. ՉԱՔՐՅԱՆ

Հայտարարում է «Ցեղասպանության անհիմն պնդումների դեմ պայքարի» միության նախագահը:

«Ազգի» նախորդ համարում Ջեմալ փաշայի թոռան` Հասան Ջեմալի «1915. հայերի ցեղասպանություն» գրքին անդրադառնալիս նշել էինք, որ դրա նկատմամբ վերաբերմունքը միանշանակ չէ Թուրքիայում: Օրինակ` «Թարաֆ» թերթի սեպտեմբերի 8-ի համարում սյունակագիր Յասեմին Չոնգարը ողջունում է Հասան Ջեմալին, գրքի մասին արտահայտվում է գոհունակությամբ ` համարելով դրա լույս ընծայումը հանուն ժողովրդավարության եւ խոսքի ազատության համար մղվող պայքարի դրսեւորում Թուրքիայում, ինչը սասանում է երկրում առկա տաբուները: Այնուհետեւ Չոնգարն ավելացնում է. «Հասան Ջեմալը գրքում համարձակ հարցեր է բարձրացնում 1915-ի հայերի ցեղասպանության առնչությամբ եւ ամենայն ազնվությամբ էլ պատասխանում հարցերին»:

Ի տարբերություն Չոնգարի, ինչպես սեպտեմբերի 11-ին նշել է haberfx.net կայքէջը, «Ցեղասպանության անհիմն պնդումների դեմ պայքարի» միության նախագահ Սավաշ Էղիլմեզը Հասան Ջեմալին համարում է Թուրքիայում հայկական սփյուռքի սպասավոր եւ բնութագրում. «Ցեղասպանության համար պատասխանատու Ջեմալ փաշայի ցեղասպանությունը ճանաչող թոռը»:

Այնուհետեւ, ըստ կայքէջի, Էղիլմեզը նշել է, որ առաջիկայում էլ ավելի կսաստկանա հայկական սփյուռքի Թուրքիայի դեմ քարոզարշավը եւ ավելացրել. «Զուգընթաց դրան, սփյուռքը կփորձի 100-րդ տարելիցին` 2015-ին, Թուրքիային պարտադրել, որ ճանաչի, այսպես կոչված, ցեղասպանությունը: ԱՄՆ-ում եւ եվրոպական երկրներում կձեռնարկվեն գլոբալ մասշտաբի աշխատանքներ ընդդեմ Թուրքիայի: Արդեն սկսել են: Սփյուռքի ձեռնարկումները կանխատեսելի են: Ուստի հետաքրքրական էր իմանալ, թե Թուրքիայում ով է ստանձնելու հայկական սփյուռքի սպասավորի դերը: Ահա այդ ռումբը պայթեցրեց Հասան Ջեմալը: Ինչպես երեւում է, առաջիկայում Հայկական հարցը հակաթուրքական երանգով կարեւոր տեղ է զբաղեցնելու մեր հասարակական կյանքում, որովհետեւ վերջին ամիսներին, երբ Թուրքիան խիստ զբաղված է Սիրիայի ու ահաբեկչության խնդիրներով, երկրում ծավալվում է բուռն գործունեություն այդ հարցն օրակարգ մտցնելու համար»:

Էղիլմեզը միաժամանակ ասել է, որ ցեղասպանության հարցն օրակարգ մտցնելու նպատակը Թուրքիային ծանր կացության մեջ գցելն է: Ապա նա շարունակել է. «Այդ առումով սփյուռքը չէր կարող ավելի հարմար մեկին գտնել, քան Հասան Ջեմալը, քանի որ վերջինս ցեղասպանության համար պատասխանատու նկատվող Ջեմալ փաշայի թոռն է: Դրա հետ մեկտեղ Հասան Ջեմալը 2010-ի ապրիլի 24-ին «Ապրիլի 24-ի առթիվ վշտակցում եմ հայերին» վերնագրով հրապարակած հոդվածում գրել էր. «Ժխտել Օսմանյան պետության` մարդկության դեմ հանցագործությունը, որը նա սկսած 1915-ից գործել է հարյուրհազարավոր հայերի հանդեպ, եւ առ այսօր այդ հանցագործությանը պոչ կպցնելը կնշանակի «հանցակից» լինել: Որքան էլ ոմանք տեղահանություն, ողբերգություն, կոտորած, ոմանք էլ Մեծ եղեռն կամ ցեղասպանություն բնութագրեն, իրողությունը ժխտել, այնուամենայնիվ, չենք կարողանում»:

Թուրքիայում սփյուռքի 2015-ին պատրաստության բնույթի ձեռնարկումների սպասարկման գլխավոր դերակատարը Հասան Ջեմալն է: Մեր երկրում արագ զարգացում է ապրելու Հասան Ջեմալի գրքով սկզբնավորված հայամետ շարժումը: Թուրք հայամետների գլխավոր նպատակը հայերից Թուրքիայի ներողությունն է, ինչպես նաեւ փոխհատուցումը: Թուրք հայամետները փորձում են նենգորեն հասնել այդ նպատակին, հետեւաբար նրանց հարցում պետք է արթուն լինեն կառավարությունը, պետության համապատասխան կառույցներն ու մեր ազգը»:

http://azg.am/AM/2012091410