Ստամբուլում դատարանի առաջ են կանգնել 44 լրագրողներ, որոնց մեծ մասը ձերբակալված է 9 ամսից ավելի: Նրանք մեղադրվում են ահաբեկչական գործունեություն ծավալելու, մասնավորապես՝ Համայնքների միությանը և Քրդստանի աշխատավորոկան կուսակցությանը սատարելու մեջ, հայտնում է The Guardian-ը:
Դատախազները նրանց համար 7,5 – 22, 5 տարվա ազատազրկում են պահանջել:
Լրագրողները, մասնավորապես, մեղադրվում են արգելված ՔԱԿ-ին աջակցելու, պետության հիմքերը խարխլող և պետությունը վարկաբեկող քարոզչության մեջ:
Լրագրողների դատապաշտպանները պնդում են, որ իրենց պաշտպանյալները մասնագիտական գործունեությամբ են զբաղվել, իսկ Թուրքիայի իշխանությունները հարձակում են սկսել անկախ մամուլի դեմ: Նման գնահատականի հետ համաձայն են նաև Amnesty International միջազգային իրավապաշտպան կազմակերպության փորձագետները: Նրանք պատրաստվում են հոկտեմբերին մի զեկույց ներկայացնել, որում խոսվում է Թուրքիայում խոսքի ազատությանը սպառնող վտանգների մասին:
Ներկայում Թուրքիայում 100-ից ավելի ազատազրկված լրագրող կա: Այս ցուցանիշով երկիրն առաջ է անցել անգամ Իրանից ու Չինաստանից: 2009-ից ի վեր ընդհանուր առմամբ 8 000 քրդամետ քաղաքական գործիչ, իրավաբան, ակադեմիկոս, գրող և ԶԼՄ-ի ներկայացուցիչ է ձերբակալվել ահաբեկչության մեղադրանքով:
http://tert.am/am/news/2012/09/13/prokurdish-journalists-court/
Leave a Reply