Ի դեմս Թուրքիայի`միջազգային հանրությունը գործ ունի բացեիբաց հայատյացություն եւ ռասիզմ հովանավորող երկրի հետ: Այդ մասին հայտարարել է Հայաստանի Ազգային Ժողովի փոխնախագահ Էդուարդ Շարմազանովը` արձագանքելով Թուրքիայի վարչապետի հայտարարությանը:
Նշենք, որ Թուրքիայի վարչապետ Ռեջեփ Թայիփ Էրդողանը երեկ Բաքվում Ադրբեջանի նախագահ Իլհամ Ալիեւի հետ համատեղ մամուլի ասուլիսի ժամանակ անդրադարձել էր Լեռնային Ղարաբաղի հակամարտության կարգավորմանը` նշելով, որ Ղարաբաղի հարցում Անկարան շարունակելու է աջակցել Ադրբեջանին:
«Մինչ ԵԱՀԿ Մինսկի խմբի համանախագահ երկրներ ԱՄՆ-ը, Ռուսաստանը, Ֆրանսիան եւ միջազգային բազմաթիվ հեղինակավոր կազմակերպություններ քննադատում եւ դատապարտում են Ադրբեջանի իշխանությունների հակամարդկային եւ անբարո քայլը, Թուրքիայի վարչապետը սատար է կանգնում Ադրբեջանին եւ հրապարակավ հայտարարում դրա մասին»,- նշել է Շարմազանովն ու հավելել. «Դեպի Եվրամիություն ձգտող Թուրքիայի վարչապետի այս հայտարարությունն ապացուցում է, որ ի դեմս այս պետության՝ միջազգային հանրությունը գործ ունի բացեիբաց հայատյացություն եւ ռասիզմ հովանավորող երկրի հետ:
Սրանից պարզ է դառնում, թե ինչու է ոճրագործ Սաֆարովը տարբեր գործիքներով մարդ սպանելու հնարքները սովորել Թուրքիայի կողմից օկուպացված Հյուսիսային Կիպրոսի ռազմաբազաներում»:
ԱԺ փոխնախագահի կարծիքով, Թուրքիան եւ Ադրբեջանը չեն մոռացել, որ «չնայած Արցախյան հերոսամարտի տարիներին Թուրքիայի կողմից Ադրբեջանին հատկացված ռազմական եւ ֆինանսական լուրջ օժանդակությանը` արցախահայությունը հաղթանակեց այդ պատերազմում` ապացուցելով ազատ եւ անկախ ապրելու, սեփական ժողովրդի ճակատագիրը միանձնյա տնօրինելու իր վճռականությունը»:
Leave a Reply