Դիարբեքիրի հայկական Սուրբ Կիրակոս եկեղեցում 97 տարի անց կրկին համերգ է տեղի ունեցել

Մերձավոր Արեւելքի ամենամեծ հայկական եկեղեցում՝ Դիարբեքիրի Սուրբ Կիրակոսում, Ցեղասպանությունից 97 տարի անց կրկին համերգ է տեղի ունեցել։

Ինչպես տեղեկացնում է NEWS.am-ի թղթակիցը Դիարբեքիրից, Սուրբ Կիրակոս եկեղեցում համերգով է հանդես եկել ստամբուլահայ, ներկայում Կանադայում ապրող հայտնի դաշնակահար Րաֆֆի Պետրոսյանը։

Համերգին մասնակցել են ԱՄՆ-ից ժամանած մոտ 80 հայեր՝ Հայ Առաքելական եկեղեցու ԱՄՆ արեւելյան թեմի առաջնորդ, արքեպիսկոպոս Խաժակ Պարսամյանի գլխավորությամբ, ստամբուլահայեր՝ Պոլսո հայոց պատրիարքական ընդհանուր փոխանորդ, արք. Արամ Աթեշյանը, հայաստանցիների փոքր խումբ, Դիարբեքիրի քաղաքապետ Օսման Բայդեմիրը, Թուրքիայի խորհրդարանի պատգամավոր Ալթան Թանը եւ այլ պաշտոնյաներ։

Դիարբեքիրի քաղաքապետ Օսման Բայդեմիրը ողջույնի խոսքով դիմել է քաղաք ժամանած հայերին՝ նշելով, թե Դիարբեքիրը ինչքան էլ որ մահմեդականների քաղաքն է, այնքան էլ հայերի քաղաքն է։ Բայդեմիրը կրկին խնդրել է Դիարբքերիրից հեռացած հայերի ժառանգներին վերադառնալ իրենց հողերը։

Րաֆֆի Պետրոսյանն իր խոսքում հիշեցրել է, որ մինչեւ 1915-ը Սուրբ Կիրակոսում ամեն ամիս համերգ է տեղի ունեցել, իսկ 1915-ին Դիարբեքիրի նահանգապետը եկեղեցուց, ի թիվս այլ իրերի, գողացել եւ իր տուն է տարել նաեւ դաշնամուրը։

Նշենք, որ Դիարբեքիրի Սուրբ Կիրակոս եկեղեցու վերոնորոգումն ավարտվել է նախորդ տարի, իսկ այս տարի կավարտվի եկեղեցական համալիրի ամբողջական վերանորոգումը, եւ նոյեմբերի 4-ի պատարագը տեղի կունենա ամբողջովին վերանորոգված համալիրում։

http://news.am/arm/news/120560.html