«Սարն ի վեր» ծրագիրը

2012թ. սեպտեմբերի 4-ին Սիվիլիթասը Բեռլինում սկսեց մի նոր ծրագիր՝ նպատակ ունենալով ուշադրություն հրավիրել հայ-թուրքական հարաբերությունների մարդկային, անհատական կողմին: «Սարն ի վեր» ծրագիրը մարդկանց անձնական փորձառության պատմությունների շարք է: Հայ և թուրք նշանավոր մարդիկ խոսում են Ցեղասպանությանն առնչվող պատմական և քաղաքական բարդ խնդիրների մասին, որոնց առերեսվել են կյանքի ընթացքում և սեփական փորձով ներկայացնում են առաջ շարժվելու իրենց տեսակետները: Այս ծրագիրը Թուրքիայում, Հայաստանում և եվրոպական մայրաքաղաքներում իրականացվում է տարբեր հասարակական հարթակներում՝  դպրոցներում, համալսարաններում, ռադիոկայաններում, թատրոններում ու թանգարաններում: Ծրագրի հիմնական նպատակն է կանոնավոր և հաստատուն քայլերի միջոցով փոխել միմյանց մասին թերտեղեկացվածության և թյուրըմբնռման մթնոլորտը:

«Սարն ի վեր» ծրագրի առաջին միջոցառումը տեղի ունեցավ Բեռլինում՝ սեպտեմբերի 4-ին, «Նաուման» հիմնադրամում: Երկրորդը կայացել է Ստամբուլում՝ սեպտեմբերի 6-ին, իսկ երրորդը կկայանա Երևանում` սեպտեմբերի 13-ին: Միջոցառումները հեռարձակվում են ուղիղ եթերով, իսկ դրանց տեսագրությունները տեղադրվում են եռալեզու կայքում, որպեսզի ավելի մեծ թվով մարդիկ դիտեն և Ցեղասպանության 100-րդ տարելիցին ընդառաջ երկու ժողովուրդների միջև ավելի շատ փոխըմբռնում լինի:

Այս հարթակն աշխարհի ամենատարբեր վայրերում գտնվող մարդկանց հնարավորություն կտա անձնապես քննարկելու դեռևս մութ և դեռևս թաքցվող պատմության բարդ հետևանքները:

Սիվիլիթասը համագործակցում է «Անադոլու կուլտուր» կազմակերպության հետ: Ծրագրին աջակցում է ԱՄՆ գերմանական Մարշալի հիմնադրամը:

http://www.armeniaturkey.org/hy/նախագծի–մասին.html