Վանա լճի Աղթամար կղզում գտնվող Սուրբ Խաչ եկեղեցում այս տարի կայացած երրորդ պատարագին մասնակցել է նաև Մարի Դուրսունյանը, ով թուրքական «Իհլաս» լրատվական գործակալությանը հայտնել է, թե կղզուց վերցրած հողը տանելու է իր հոր և մոր գերեզմաններին:
Նշյալ լրատվամիջոցի փոխանցմամբ` արտասահմանից Վան ժամանած հայերը աղոթել և մոմեր են վառել կղզում: Պատարագին ներկա գտնված Մարի Դուրսունյանը, որն արմատներով դիարբեքիրցի է, իր մեծ ուրախությունն է արտահայտել` առաջին անգամ Աղթամար կղզին տեսնելու կապակցությամբ: Դուրսունյանը շեշտելով, որ շատ է հուզվել` առաջին անգամ մասնակցելով Աղթամար կղզու Սուրբ Խաչ եկեղեցու պատարագին, նաև ասել է. «Դիարբեքիրում հայրս ինձ միշտ եկեղեցի էր տանում, որտեղ աղոթում էի: Տարիներ հետո այստեղ գալը և աղոթք անելը հրաշալի զգացում է»:
Դուրսունյանը հայտնելով, թե իր ընտանիքը շատ է սիրել Աղթամար կղզին, նշել է. «Հորս և մորս տարիներ առաջ եմ կորցրել: Հետս վերցրած հողի կեսը տանելու եմ Ստամբուլում գտնվող հորս գերեզմանին, իսկ մնացյալը` Ֆրանսիա, որտեղ թաղված է մայրս: Չեմ կարող բառերով արտահայտել այն երանությունը, որ ապրում եմ ներկա պահին»:
Akunq.net
Leave a Reply