«Հայկական եկեղեցին պե’տք է վերադարձվի համայնքին». Նոր Կիպրոս կուսակցություն

Նոր Կիպրոս կուսակցությունը հայտարարություն է տարածել Կիպրոսի Արաբահմեթ շրջանում վերականգնվող հայկական եկեղեցին մի համալսարանի հանձնելու կապակցությամբ: Ստորև ներկայացնում ենք կուսակցության հայտարարությունը.

«Ցավ ենք ապրում Լեֆքոշում` Արաբահմեթ շրջանում, 1964 թ. առաջ որպես հայկական եկեղեցի օգտագործված Սուրբ Աստվածածին եկեղեցու կարգավիճակի վերաբերյալ քննարկումների կապակցությամբ:

Կիպրոսահայերը 1960 թ. Սահմանադրության կողմից պաշտոնապաես ճանաչված երեք փոքրամասնություններից մեկն են: Կիպրոսում տեղի ունեցած բախումներն ու անջատումները շատ ավելի մեծ աղետներ հասցրել են փոքրամասնություններին:

Մյուս փոքրամասնություններից մարոնիտները հարկադրված եղան լքել 1974 թ. առաջ իրենց բնակավայրերի մեծ մասը: Մինչ այդ մարոնիտների ապրած Ասոմատոսը (Özhan) և Այիա Մարինան (Gürpınar) ներկա պահին լրիվ մնացել են ռազմական գոտու շրջանում, իսկ Քարփաշիա (Karpaşa) և Քորմաքիթիս (Kormacit) գյուղերում մարոնիտներին սահմանափակ պայմաններով են թույլ տալիս բնակվել: 1974 թ. հետո ի հայտ եկած դե ֆակտո իրավիճակում լուրջ ավերածության ենթարկվեց նաև կիպրոսցի մարոնիտների մշակութային ժառանգությունը: Նրանք կանգնած են փոքրամասնություն լինելու պատճառով արդեն իսկ քիչ մնացած իրենց մշակութային ժառանգությունը լիովին կորցնելու վտանգի առաջ… Ոչնչանալու վտանգի տակ է նաև 1700-ականներից այսօր ավերակ վիճակում պահպանված Էլիաս մարգարեի վանքը, որը պատկանում է մարոնիտներին…

Նման խնդրի առջև են կանգնած նաև կիպրոսահայերը: Ալևքայասըում 15-րդ դարում կառուցված և ավերակ վիճակում գտնվող Սուրբ Մակար հայկական վանքը (Մակարավանք) նույնպես ոչնչացման եզրին է գտնվում:

Հայերն ու մարոնիտները այսօր մեզ հասած մեծ պատմական ժառանգություն չունեն. այդ պատճառով էլ դրանք պահպանելը կարևոր է:

Լեֆքոշում` Արաբահմեթ շրջանում, գտնվող Սուրբ Աստվածածին եկեղեցին ևս մեկն էր այն սակավաթիվ մշակութային արժեքներից, որոնք մեր օրեր են հասել:

Սույն եկեղեցու վերականգնման համար թե’ Կիպրոսի և թե’ արտերկրի հայկական համայնքների կարծիքն էլ հաշվի առնելով` աշխատում էին եկեղեցին վերակառուցել` բնօրինակին հնարավորինս մոտ կերպով: Սակայն եկեղեցին շահագործման համար հանձնվել է մի համալսարանի: Այլ համալսարաններ էլ բողոքել են, թե այն իրենց չի տրվել:

Վաքըֆների այդ դիրքորոշումն անընդունելի է…

Առանց այդ էլ սակավաթիվ մնացած նմանատիպ բոլոր մշակութային հուշարձանները, օգտագործման իրավունքներով հանդերձ, պետք է հանձնվեն համայնքներին:

Կիպրոսը պետք է ապագային հանձնվի` պահպանելով իր բոլոր մշակութային գույները: Այդ նպատակով էլ պետք է պայքարել` Կիպրոսի հյուսիսում տարիներ շարունակ սիստեմատիկ կերպով կատարված մշակութային ավերածությունների դեմ:

Այդ նպատակով կոչ ենք անում Վաքըֆների վարչության ղեկավար խորհրդին` վերանայել հայկական եկեղեցու առնչությամբ կայացրած իր որոշումը և այն, օգտագործելու իրավունքով հանդերձ, տալ կիպրոսահայերին:

Մենք այս գործընթացում հետևողական ենք լինելու և’ Կիպրոսում, և’ միջազգային ասպարեզում:

http://www.kibrispostasi.com/index.php/cat/35/news/88042/PageName/KIBRIS_HABERLERI

Թարգմանեց Մելինե Անումյանը

Akunq.net