Սլովակիայում Թուրքիայի դեսպանուհին չի հերքում Հայոց ցեղասպանության փաստը. ԵՀՄՖ

Եվրոպայի Հայկական Միությունների Ֆորումի (ԵՀՄՖ) նախագահության մամլո քարտուղարությունը հաղորդագրություն է տարածել, որում տեղեկացնում է, որ սենսացիոն Սլովակիայում Թուրքիայի դեսպանուհին կատարել է հայտարություն՝ ճանաչելով Հայոց ցեղասպանությունը:

Այս առնչությամբ ԵՀՄՖ-ի նախագահ Աշոտ Գրիգորյանը պաշտոնական նամակ է ուղղել Սլովակիայում Թուրքիայի դեսպանուհի տիկին Գյուլհան Ուլութեքինին, իսկ նամակի պատճենը` Թուրքիայի ԱԳ նախարար Ահմեդ Դավութօղլիին` հայտնելով խորին շնորհակալություն անկեղծ խոստովանության համար, սա համարելով մեծ նվաճում հայ-թուրքական հարաբերություններում պարզություն մտցնելու կարևոր գործում:

Ստորև ներկայացնում ենք փաստի առնչությամբ Եվրոպայի Հայկական Միությունների Ֆորումի (ԵՀՄՖ) նախագահության մամլո քարտուղարության հաղորդագրությունը.

Եվրոպայի Հայկական Միությունների Ֆորումի և Սլովակիայի Հայկական Համայնքի նախագահ Աշոտ Գրիգորյանն ամիսներ առաջ դիմել էր Սլովակիայի գլխավոր դատախազություն` պարզելու Սլովակիայում Թուրքիայի արտակարգ և լիազոր դեսպանուհի Գյուլհան Ուլութեկինի կողմից Սլովակիայի Քրեական Օրենսգրքի 424/ա հոդվածի, այն է` Հայոց ցեղասպանության ժխտումը քրեական հանցագործություն համարող օրենքի վերոհիշյալ պարագարաֆի խախտման շուրջ, որի դեպքում նախատեսվում է ազատազրկում մինչև հինգ տարի ժամանակով:

Խոսքն այս տարվա ապրիլին Հայոց ցեղասպանության հուշաքար-խաչքարի մոտ տեղի ունեցած միջոցառման դեմ դեսպանուհու գրած արձագանքի մասին էր, «Հայերը,Միկլոշկոն և Հարաբինը» վերնագրով` հրապարակված «Տիժդեն» շաբաթաթերթի մայիսի 4-ի համարում, որտեղ դեսպանուհին կասկած էր հայտնել Հայոց ցեղասպանության փաստի վերաբերյալ` միաժամանակ նշելով, որ «այդ ժամանակաշրջանում առավել շատ թուրքեր են կոտորվել»:

Եվ ահա դատախազության հանձնարարությամբ Սլովակիայի ՆԳ ոստիկանության վարչությունը պարզաբանել է կատարվածը Թուրքիայի դեսպանուհու հետ և ստացել է հստակ պատասխան, որը մեջբերում ենք. «….դեսպանուհին այդ հարցի շուրջ (ի նկատի ունեն Հայոց ցեղասպանության փաստը) արտահայտվում է շատ զգուշորեն, դիվանագիտորեն և կասկածի տակ չի դնում այն (Հայոց ցեղասպանությունը)»:

ՆԳ պատասխանատու պաշտոնյան գրում է. «Հետևաբար, այս հարցի շուրջ ունենալով հենց իր` դեսպանուհու անձնական կարծիքը հայտնի դեպքերի, փաստերի հաստատման վերաբերյալ, հայտարարում եմ, որ նա ՔՕ-ի համապասխան հոդվածը չի խախտել»:

Այսինքն, ըստ ՆԳ մարմնի պարզաբանման` թուրք դեսպանուհին, որպես պետական պաշտոնյա և դիվանագետ, չի հերքում Հայոց ցեղասպանության փաստը:

ԵՀՄՖ-ն Սլովակիայի ՆԳ նախարարության կողմից վարած աշխատանքները համարում է բավարար և ընդունում, որ Թուրքիայի դեսպանուհու տված բացատրություններն իսկապես հաստատում են Հայոց ցեղասպանության փաստը, և սրանով նա դառնում է առաջին թուրք դեսպանն աշխարհում, որն ընդունում է 1915 թ. Օսմանյան կայսրությունում հայերի նկատմամբ կատարված կոտորածները որպես ցեղասպանություն:

ԵՀՄՖ-ի նախագահ Աշոտ Գրիգորյանը պաշտոնական նամակ է ուղղել Սլովակիայում Թուրքիայի դեսպանուհի տիկին Գյուլհան Ուլուտեկինին, իսկ նամակի պատճենը` Թուրքիայի ԱԳ նախարար Ահմեդ Դավուդօղլիին` հայտնելով խորին շնորհակալություն անկեղծ խոստովանության համար, սա համարելով մեծ նվաճում հայ-թուրքական հարաբերություններում պարզություն մտցնելու կարևոր գործում:

Միաժամանակ ԵՀՄՖ-ն հույս է հայտնում,որ այս առաջին ձեռքբերումը հիմք կհանդիսանա Թուրքիայի ԱԳՆ-ի համար նույն ոգով շարունակելու Հայոց ցեղասպանության շուրջ պարզաբանումները և կարճ ժամանակում գալու ընդհանուր հայտարարի և համանման հայտարարությամբ հանդես գալու արդեն ողջ աշխարհի առջև:

Ըստ ԵՀՄՖ-ի նախագահի, սա կլինի մեծ նվեր հայ և թուրք ժողովուրդների համար Հայոց ցեղասպանության հարյուրամյա տարելիցին ընդառաջ:

http://haynews.am/hy/1347258364