Աղթամարի Սուրբ Խաչում պատարագն իրականացվել է հայաստանցիների ակտիվ մասնակցությամբ. ռեպորտաժ Վանից (ֆոտոռեպորտաժ)

Վանի Աղթամար կղզու Սուրբ Խաչ եկեղեցում սեպտեմբերի 9-ին, Հայոց ցեղասպանությունից 97 տարի անց մատուցվեց 3-րդ պատարագը (ֆոտոռեպորտաժ):

Ինչպես Վանից տեղեկացնում է NEWS.am-ի թղթակիցը, Հայ առաքելական եկեղեցու արեւելյան թեմի առաջնորդ, արքեպիսկոպոս Խաժակ Պարսամյանի գլխավորությամբ պատարագը սկսվել է ժամը 11:00-ին: Պատարագի ժամանակ աղոթել են նաեւ Սիրիայում տեղի ունեցող իրադարձությունների եւ նախորդ տարվա Վանի ուժգին երկրաշարժի հետեւանքով զոհվածների համար:

Նախորդ տարիների համեմատ` պատարագին մասնակցողների թիվը զգալի պակաս էր, սակայն այս տարի Աղթամարում էին գտնվում ավելի շատ հայաստանցիներ, քան նախորդ երկու տարիներին:  Եթե առաջին տարում պատարագին մասնակցել էր մոտ 50 հայաստանցի, այս տարի պատարագին մասնակցող հայաստանցիների թիվն անցնում էր 300-ը: Այս տարի ԱՄՆ-ից եւս հայերի մեծ խումբ էր եկել՝ մոտ 70 հոգի: Հետաքրքիր էր նաեւ, որ պատարագին ժամանել էին նաեւ հայեր Դիարբեքիրից, Մուշից եւ Սասունից:  Պատարագի շատ մասնակիցներ հուզվել էին եւ չէին կարողանում թաքցնել արցունքները: Պատարագից հետո եկեղեցում Հայաստանից ժամանած քահանայի ղեկավարությամբ տեղի ունեցավ երկու հայաստանցի երեխաների մկրտություն:

Մասնակիցների թվում էր նաեւ հայկական «Ակունք» համույթը եւ «Վան նախագիծը», որոնք պատարագից մեկ օր առաջ Վանում հրաշալի համերգ էին կազմակերպել՝ շահելով հանդիսատեսների բուռն ծափահարությունները:

Պատարագի ավարտից հետո «Ակունք»-ը ելույթներով հանդես եկավ՝ առաջ բերելով կղզում գտնվողների մեծ հետաքրքրությունը: Ներկաները մեծ ոգեւորությամբ հետեւում էին համերգին եւ վերջում նկարվեցին «Ակունք»-ի մասնակիցների հետ հայկական եռագույն դրոշներով, որին անմիջապես արձագանքեցին թուրք լրագրողները` արագ ֆիքսելով դրոշներով կադրերը:

Պոլսո հայոց պատրիարքարանի որոշմամբ՝ այս տարվա պատարագի ժամանակ վաճառված մոմերից ստացված եկամուտը հանձնվել է Վանի նահանգապետարանի հատուկ հաշվեհամարին՝ օգնություն ցուցաբերելու Վանի երկրաշարժից տուժածներին:

Պատարագի անվտանգ անցկացման համար թուրքական իշխանությունները Աղթամար կղզի էին ուղարկել մոտ 200 ոստիկանի, որոնց մի մասը քաղաքացիական հագուստով էր: Կղզում հերթապահության էր կանգնած Առողջապահության նախարարության ուղղաթիռը, իսկ օդից կղզում գտնվողների անվտանգությունը ապահովում էր ոստիկանության հատուկ ուղղաթիռը: Ափից մինչեւ կղզի ընկած հատվածում մշտական հերթապահության մեջ էին փրկարար ջոկատների մոտորանավակները:

Սուրբ Խաչի պատարագին մասնակցում էին Վանի փոխքաղաքապետ Սաբրի Աբին (քաղաքապետը գտնվում է կալանքի տակ), Վանի փոխնահանգապետ Աթայ Ուսլուն, Գեւաշի քաղաքապետ Նազմի Սեզերը, Գեւաշի քայմաքամ Յուսուֆ Գյունին, Թուրքիայի խորհրդարանի պատգամավոր, քրդական Խաղաղություն եւ ժողովրդավարություն կուսակցության անդամ Նազմի Գյուրը եւ այլք:

Աղթամարի Սուրբ Խաչ եկեղեցին 915-921 թվականներին կառուցվել է Վասպուրականի իշխան Գագիկ Արծրունու պատվերով` ճարտարապետ, քանդակագործ և նկարիչ Մանվելի կողմից։ Տաճարի արտաքին պատերը զարդարված են 6 հորիզոնական շարք կազմող զարդաքանդակներով, որոնք չեն խախտում պատերի հարթությունը։ Զարդաքանդակները ստեղծելիս Մանվելը հաշվի է առել հնարավոր դիտանկյունները և տարբեր ժամերի լուսավորությունը։ Պատերից մեկի վրա Գագիկ Արծրունու դիմաքանդակն է, կողքին՝ ողջ հասակով Քրիստոսը, որին արքան պարզում է եկեղեցու մանրակերտը։

http://news.am/arm/news/120327.html