Թուրքիայում շուրջ 45 հազար «աշխարհազորային» կա

Թուրքիայում 45 181 մարդ է զբաղվում գյուղերի պաշտպանությամբ, փոխանցում է CNNTurk-ը:

Թուրքիայի ներքին գործերի նախարար Իդրիս Նաիմ Շահինը բացահայտել է «աշխարհազորայինների» (թուրքերեն` «քորուջու») թիվն ու նրանց տրվող աշխատավարձի չափը:

Նշենք, որ «աշխարհազորայինները» հիմնականում կազմված են քրդերից, աշխատավարձ են ստանում պետությունից և «պաշտպանում» են գյուղերը «Քրդստանի աշխատավորական կուսակցության» (PKK) անդամներից: Մեծ հաշվով թուրքական այս սխեմայով քրդերը դուրս են գալիս քրդերի դեմ:

«Աշխարհազորայինները» հիմնականում ծառայություն են տանում Թուրքիայի հարավարևելյան քրդաբնակ շրջաններում, որը երկրի ամենաթույլ զարգացած շրջանն է:

Ըստ թուրք նախարարի` ներկայում Թուրքիայում ծառայություն է իրականացնում 45 181 «աշխարհազորային»: Նրանց ամսական աշխատավարձը կազմում է 761 թուրքական լիրա (422 ամերիկյան դոլար): «Աշխարհազորայինների» համար նախատեսված են նաև հատուկ պարգևավճարներ` գործողություններ իրականացնելու համար:

Թոշակի անցած «աշխարհազորայինները» ստանում են 344-529 լիրա գումար (190-300 դոլար):

Նշենք, որ այս գումարները զգալի ցածր են Թուրքիայի զինված ուժերում ծառայություն տանողների ստացած աշխատավարձերից:

http://haynews.am/hy/1347005127