Վանի Սուրբ Խաչ եկեղեցին պատրաստ է պատարագի

Ավարտվել են սեպտեմբերի 9–ին Վանի Աղթամար կղզու Սուրբ Խաչ եկեղեցում կայանալիք պատարագի նախապատրաստական աշխատանքները: Ինչպես հաղորդում է «Արմենպրես»-ը` այս մասին տեղեկացնում է թուրքական Haberler.com կայքը:

Վանի փոխնահանգապետ Աթայ Ուսլուն, իր մոտ կանչելով պատարագի պատրաստությամբ զբաղվող բոլոր կազմակերպություններին, աչքի է անցկացրել վերջին բացթողումները: Նախորդ անգամների նման, այս անգամ ևս պատարագի նախապատրաստական աշխատանքներն իրականացրել են Վանի նահանգապետարանի վերահսկողության տակ գործող Գևաշ գավառի ղեկավարությունն ու Մշակույթի և տուրիզմի նահանգային վարչությունը:

Պատարագը լուսաբանող լրագրողների համար առանձնացվել են հատուկ վրաններ, իսկ սեպտեմբերի 8–ից արդեն կղզում հատուկ հսկողություն են սահմանելու անվտանգության աշխատակիցներն ու բուժաշխատողները: «Ներկայում ոչ մի բացթողում չի մնացել: Սպասում ենք ակտիվ մասնակցություն: Հյուրանոցներում արդեն իսկ համարներ են վարձվել: Սպասում ենք մոտ երեք հազար հյուրերի: Հյուրերին կղզի տեղափոխելու համար նրանց տրամադրության տակ կլինեն 14 նավեր»,- ասել է Գևաշի գավառապետ Յուսուֆ Գյունին:

Վանի Աղթամար կղզում գտնվող Սուրբ Խաչ հայկական եկեղեցում սեպտեմբերի 9–ին կայանալիք պատարագը երրորդն է լինելու 2007 թ. եկեղեցու վերանորոգումից հետո:

http://armenpress.am/arm/news/692439/vani-surb-khach-ekexecin-patrast-e-pataragi.html