Թուրքիան Ֆրանսիային նոտա է հղել` Հայոց ցեղասպանության թեման դպրոցական դասագրքերում ընդգրկելու համար

Ֆրանսիայի միջնակարգ դպրոցներում Հայոց ցեղասպանության թեմայի ընդգրկման փաստը նոր լարվածություն է առաջացրել Փարիզ-Անկարա հարաբերություններում:

Թուրքական www.samanyoluhaber.com լրատվական կայքի փոխանցմամբ` Փարիզում Թուրքիայի դեսպանությունը պաշտոնապես նոտա է ներկայացրել Ֆրանսիայի արտգործնախարարությանը և Ազգային կրթության նախարարությանը` պահանջելով վերանայել այն երկու էջերը, որոնցում տեղ է տրվել Ցեղասպանության թեմային: Նոտայում նշվել է, թե իբրև թե կեղծ են Արամ Անտոնյանի «Նայիմ բեյի հուշերը. թուրքական պաշտոնական փաստաթղթերը` հայոց տեղահանության և կոտորածների վերաբերյալ» գրքից վերցված` Թալեաթ փաշային վերագրվող հեռագրերը, որոնք ներառվել են դասագրքերում: Դեսպանության կողմից ներկայացված նոտայում ընդգծվել է, թե դասագրքերում արված փոփոխությունները «ատելություն են հրահրում հասարակությունների միջև»: Փարիզում Թուրքիայի դեսպանատունը նաև մի մանրամասն զեկույց է կցել բողոքի նոտային` հղում անելով «պատմական աղբյուրների»: Դեսպանությունը նաև շեշտել է, թե դասագրքերում արված այդ փոփոխությունը բացասական ներգործություն կթողնի ֆրանսաբնակ թուրք աշակերտների վրա:

Արամ Անտոնյանի գրքում բերված փաստաթղթերի առնչությամբ ընդգծենք, որ հեղինակը հիշյալ հեռագրերը հրատարակելուց առաջ ներկայացրել է Սողոմոն Թեհլերյանի գործը քննող գերմանական դատարանին: Այդ 5 վավերագրերն ուսումնասիրվել են հատուկ մասնագետների կողմից, որոնք հաստատել են դրանց վավերականությունը:

Akunq.net