Վանում գործարարները պատրաստ են ընդունել Աղթամարի պատարագին մեկնող հայերին

Վանի Աղթամար կղզու Սուրբ Խաչ եկեղեցում սեպտեմբերի 9-ին տեղի ունենալիք պատարագի կապակցությամբ Վան նահանգի Գեւաշի շրջանում տուրիզմի ոլորտի գործարարները ավարտել են նախապատրաստական աշխատանքները եւ պատրաստ են պատշաճ կերպով ընդունել Վան ժամանած հայերին։ Այս մասին տեղեկացնում է թուրքական «Իհլաս» լրատվական գործակալությունը։

Վանի տուրիզմի ոլորտի գործարարները նշել են, թե ավարտին են հասցվել տրանսպորտի, իջեւանելու եւ սննդի ապահովման հետ կապված աշխատանքները։

Աղթամար կղզու դիմաց գտնվող Աղթամար ռեստորանի սեփականատեր Իբրահիմ Ալքանը հայտնել է, թե պատարագի հետ կապված զբոսաշրջային կազմակերպություններից արդեն սկսել են ամրագրումներ վերցնել։  Իբրահիմ Ալքանը նշել է, թե իրենք մշտապես հետեւում են իրենց տարածքի մաքրման եւ բարեկարգման աշխատանքներին, իսկ պատարագի հետ կապված` դրանք ավելի մանրակրկիտ են իրականացվում։

Գեւաշի նավահանգստից դեպի Աղթամար կղզի փոխադրումներ իրականացնող Akdamar Göl Motorlu ընկերության նախագահ Ռեջեփ Ավջըն նշել է, թե իրենց ընկերության նավերը եւս մեկ անգամ ստուգում են անցնելու մինչեւ պատարագի օրը։ Նա շեշտել է, թե իրենց նավերը մեկ ուղերթից կղզի կարող են հասցնել միանգամից 1700 հոգու։

Վան նահանգում գտնվող հյուրանոցների սեփականատերերի խոսքով՝ իրենք եւս սկսել են պատարագի օրվա հետ կապված հյուրանոցային ամրագրումները։

Նշենք, որ Թուրքիայի կառավարության միջոցներով Աղթամարի Սուրբ Խաչը վերանորոգվել էր 2007 թ.: Այնուհետև Պոլսո Հայոց պատրիարքարանը դիմել էր Թուրքիայի կառավարությանը՝ Աղթամարի Սուրբ Խաչում տարին մեկ անգամ պատարագ իրականացնելու թույլտվություն ստանալու համար: 2010 թ. մարտին Թուրքիայի մշակույթի նախարար Էրթուղրուլ Գյունայը հայտարարել էր, թե արդեն կա Սուրբ Խաչում պատարագ իրականացնելու եւ եկեղեցու գմբեթին խաչ տեղադրելու թույլտվությունը: Պատարագի անցկացման օր էր նշանակվել սեպտեմբերի երկրորդ կիրակին, որն համընկնում էր Սուրբ Խաչ եկեղեցական տոնի հետ:

Աղթամարի Սուրբ Խաչում այս տարի պատարագ կիրականացվի 3-րդ անգամ։ 

http://news.am/arm/news/119478.html