Հունգարական իշխանությունների կողմից Ադրբեջանին հանձնված մարդասպան Ռամիլ Սաֆարովին հերոսացնելու ճղճիմ փաստին է անդրադարձել թուրքական Radikal պարբերականի սյունակագիր, իրավաբան Օրհան Քեմալ Ջենգիզը։
«Ադրբեջանն այս օրերին կոլեկտիվ խելագարության մեջ է թավալվում։ 2004 թ. Ռամիլ Սաֆարովը Հունգարիայում ՆԱՏՕ-ի դասընթացների ժամանակ գիշերը կացնով սպանում է նույն շենքում քնած հայ սպա Գուրգեն Մարգարյանին։ Հունգարական դատարանի առաջ կանգնած Սաֆարովը պնդում է, թե սպանությունը կատարել է, քանի որ հայ սպան տրորել է ադրբեջանական դրոշը։ Սակայն հետո պարզ է դառնում, որ դրանից առաջ հայ եւ ադրբեջանցի սպայի միջեւ որեւէ շփում չի եղել, բացի այդ` Սաֆարովը Գուրգենին սպանելուց հետո փորձել է մեկ այլ հայ սպայի եւս սպանել։
Սաֆարովի արածը ատելության հողի վրա իրականացրած սպանություն էր։ Հունգարական դատարանը ցմահ ազատազրկման է դատապարտում Սաֆարովին, սակայն Ադրբեջանի խոստումներին հավատալով, թե նա պատիժը կշարունակի կրել Ադրբեջանում, նրան հանձնում է Ադրբեջանին։
Բայց ի՞նչ պատիժ։ Ադրբեջանում Սաֆարովին ընդունում են որպես ազգային հերոս, ներում, վերադարձնում պաշտոնին, տուն նվիրում, վճարում հավաքված աշխատավարձը։ Հայ սպային վայրենաբար սպանած Սաֆարովի շուրջ սկսում են հերոսական պատմություններ շրջանառվել։ Եթե սա կոլեկտիվ խելագարություն չէ, ապա ի՞նչ է։ Այժմ այս կոլեկտիվ խելագարության պատճառով ամբողջ Անդրկովկասը սկսում է եռալ, եւ Հայաստանի ու Ադրբեջանի միջեւ լարվածությունը արագ աճում է»,-գրել է թուրքական Radikal-ի սյունակագիրը։
Leave a Reply