Ցեղապաշտական բնույթի սպառնալիքի պատճառով լքել է Թուրքիան

Էլիզաբեթ Մարիա Փըչաքչըն, որը Թուրքիայում զբաղվում էր ոսկերչությամբ, մրցակցության պատճառով ենթարկվել է ցեղապաշտական բնույթի սպառնալիքների: Երբ սպառնալիքներն աճել են, նա հայտնել է Թուրքիան լքելու իր որոշման մասին: Այդ մասին հաղորդում է «Միլլիյեթ» պարբերականը:

Մուղլայի Մարմարիս գավառում 2 տարի առաջ շուկայում մի վաճառականի կողմից ցեղապաշտական բնույթի սպառնալիքի ենթարկված լինելու պատճառով դատական գործ հարուցած հայազգի Էլիզաբեթ Մարիա Փըչաքչըն այն բանից հետո, երբ դատախազությունն «անհիմն» է համարել մեղադրանքը, և իրեն ուղղված սպառնալիքներն աճել են, ընտանիքի հետ մեկտեղ լքել է Թուրքիան:

Փըչաքչըն այժմ սպասում է որևէ արաբական երկրում օտարերկրացիների համար նախատեսված ճամբարում ապաստան ստանալու իր դիմումի պատասխանին: Հետագայում կրկին Թուրքիա վերադառնալու մասին լսել անգամ չուզող Փըչաքչը ընտանիքն իր գլխին եկածները մասին գրել է Facebook-ի “İnsanlık adına bir adım da sen at” («Մի քայլ էլ դու նետիր` հանուն մարդկության») էջում:

Ավելի վաղ «Ակունք»-ը հայտնել էր, որ Թուրքիայի հայազգի քաղաքացի Էլիզաբեթ Մարիա Բըչաքչըն էթնիկական խտրականության վերաբերյալ բողոքով դիմել էր Թուրքիայի ազգային մեծ ժողովի (ԹԱՄԺ) Խնդրագրերի հանձնաժողովին: Փըչաքչըն հայտնելով, թե վտանգի է ենթարկված իր և ընտանիքի կյանքի ու գույքի ապահովությունը, նշել էր, որ առևտրական կյանքում իրեն հանգիստ չտվող մի թուրք կին վաճառական հենց շուկայի մեջտեղում իրեն «անպատիվ հայ շուն» էր անվանել: Ուշագրավ է, որ թեև Փըչաքչըն ոստիկանատուն էր դիմել` դատախազության կողմից դատական հետապնդում սկսելու նպատակով, սակայն` ապարդյուն: Արդարադատության նախարարությունը խնդրի վերաբերյալ տեղեկություններ հայցած մեջլիսի հանձնաժողովին հաղորդել էր, թե սույն դատական հայցին վերաբերող հանգամանքները դատախազության իրավասության տակ են գտնվում: Պարզվել էր, որ դատախազությունն էլ իր հերթին որոշել էր, թե գործում ներկայացված հանգամանքները բավարար չեն` դատական հետապնդում սկսելու համար:

Akunq.net