Թուրքիայի` Եվրամիության հարցերով պետնախարար Էգեմեն Բաղըշը հարցազրույց է տվել Ֆրանսիայում լույս տեսնող Politique Internationale ամսագրին, որտեղ անդրադարձել է նաև հայ-թուրքական հարաբերություններին:
«Թուրքիան Հայաստանի հետ հարաբերություններում երբեք ժլատ չի եղել»,-հայտարարել է Բաղըշը:
Նա ուշադրություն է հրավիրել այն հանգամանքի վրա, որ հայկական ինքնաթիռներն առանց խոչընդոտի վայրէջք են կատարում Թուրքիայում: Բաղըշը հիշեցրել է նաև Թուրքիայում անօրինական բնակվող և աշխատող շուրջ 100.000 հայերի մասին:
Բաղըշը անդրադարձել է հայ-թուրքական արձանագրությունների, Թուրքիայի նախագահ Աբդուլլահ Գյուլի` ֆուտբոլային խաղը դիտելու նպատակով Հայաստան կատարած այցի, ապա` Սերժ Սարգսյանի` Բուրսա կատարած պատասխան այցի մասին, որը «երկրների միջև անտեսանելի առաջընթաց ապահովվեց»:
Հարցազրույցում Բաղըշն անդրադարձել է Եվրոպական Միությանն անդամակցելու գործընթացին և նշել, թե Թուրքիան ԵՄ-ին անհրաժեշտ է այնքան, որքան Թուրքիան ունի ԵՄ կարիքը:
Նա նշել է, որ Ֆրանսիայի նախագահի պաշտոնում Ֆրանսուա Օլանդի ընտրվելուց հետո իրենք հույս ունեն, որ իրենց հարաբերություններում նոր էջ է բացվելու: Բաղըշը հիշեցրել է, որ Ֆրանսիայի նախկին նախագահ Նիկոլա Սարկոզին դեմ էր Թուրքիայի անդամակցությանը ԵՄ-ին, և հույս է հայտնել, որ Ֆրանսուա Օլանդն այդ կերպ չի վարվի, քանի որ Թուրքիայի անդամակցությունը բխում է նաև Ֆրանսիայի շահերից:
Leave a Reply