Դերսիմի հայերի հավատքի և սոցիալական փոխօգնության միության նախագահ Միհրան Փրկիչ Գյուլթեքինը «Ակունք»-ի հետ զրույցում նշել է, որ Դերսիմի երկու հայկական եկեղեցիները, որոնք ամբողջությամբ փլուզման եզրին են, պաշտպանության տակ են վերցվելու` գոնե ներկայիս տեսքով պահպանվելու համար.
«Մեր միության ստամբուլյան աշխատանքների շրջանակում երկար ժամանակ մշակված ծրագրի համաձայն` ՀԱՅՃԱՐ միության հետ միասին, ինչպես նաև` «Անադոլու քուլթուր»-ի մասնակցությամբ օգոստոսի 30-ին կամ 31-ին 6 հոգով մեկնելու ենք Դերսիմ` Հոզաթի Էրգան գյուղի և Մազկերտի հայկական եկեղեցիների ներկայիս վիճակը գեթ պահպանելու ուղղությամբ աշխատանքներ կատարելու նպատակով: Սակայն մեր նախագիծը միայն պահպանությամբ չի սահմանափակվելու: Նպատակ ունենք առաջիկայում վերանորոգել. այս պահին մեր ուժերը չեն ներում: Եթե նյութական աջակցություն լինի, վաղն էլ կարող ենք ձեռնամուխ լինել վերականգնման աշխատանքներին: Եթե լինեն կազմակերպություններ, որոնք պատրաստ են նյութական աջակցություն ցուցաբերել, ցանկանում ենք Հայաստանի, ինչու չէ, միգուցե նաև Իտալիայի ճարտարապետների հետ աշխատելով` Էրգան եկեղեցու տեղում նոր եկեղեցի կառուցել: Ըստ էության, բոլորն էլ գիտեն, թե ինչ հիանալի եկեղեցի է եղել: Սրա մասին անտեղյակ մեկը չկա»:
Դերսիմի հայերի հավատքի և սոցիալական փոխօգնության միությունը նաև ծրագրում է Մազկերտ նահանգում Հրանտ Դինքի հիշատակին նվիրված գրադարան բացել: Դերսիմից վերադառնալուց հետո նախագիծը ներկայացնելու են «Անադոլու քուլթուրին», որը և պետք է զբաղվի ֆինանսական հարցերով: Որքան շուտ կարգավորվեն ֆինանսական հարցերը, այնքան շուտ ծրագիրը կյանքի կկոչվի:
Անահիտ Քարտաշյան
Akunq.net
Leave a Reply