The Guardian-ը կանխատեսում է. Թուրքիային ավելի վատ բաներ են սպասվում

Անգլիական The Guardian թերթը, Սիրիայի ճգնաժամով պայմանավորված, Թուրքիայի համար վատ սցենար է կանխատեսում: Թերթն իր` «Սիրիա, հետադարձ չունեցող կետ» վերնագրով հոդվածում գրում է, որ «այսօր Սիրիայում հետադարձ չունեցող կետի հասած ճգնաժամից ամենավատ ազդեցությունը կրած երկրներից մեկը Թուրքիան է»:

Ինչպես հաղորդում է «Արմենպրես»–ը, թերթը գրում է, որ Սիրիայի իշխանական ուժերի եւ ընդդիմադիրների միջեւ 18 ամիս առաջ սկսված եւ ներքին պատերազմի վերածված արյունալի ու տասնյակ հազարավոր մարդկանց կյանքեր խլած բախումներն իրենց խիստ բացասական ազդեցությունը կթողնեն Մերձավոր Արեւելքի եւ Թուրքիայի վրա:

Թերթն իր վերլուծականում գրում է. «Բաշար ալ Ասադի վարչակարգի եւ Սիրիայի ազատ բանակի միջեւ խնդիրը վերածվել է «կյանքի եւ մահվան» սկզբունքի: Սիրիայում ներքին պատերազմը սպառնում է ամբողջ Մերձավոր Արեւելքին… Ընդդիմադիրների ամենամեծ ցանկությունն այն է, որ ազդեցիկ երկրները միջամտեն: Նման իրավիճակում խնդիրը չի կարող մնալ Սիրիայի սահմաններում: Եթե Սիրիայում ճգնաժամը դուրս գա այդ երկրի սահմաններից, ապա Մերձավոր Արեւելքում անցյալ դարասկզբին Օսմանյան կասյրության փլուզումից հետո տեղի ունեցածներից ավելի խոր փոփոխություններ ի հայտ կգան»:

Թերթը նշում է, որ Սիրիայի ապստամբությունից ոգեւորված` Իրաքի իսլամական խմբավորումները կրկին ուժեղացնում են Իրաքում իրենց ներկայությունը, եւ համոզմունք է հայտնում, որ Դամասկոսի ղեկավարության տապալումը` Իրանի հետ միասին, մեծ պարտություն կլինի նաեւ «Հզբոլլահ»-ի համար: «Այդ ժամանակ Թուրքիայի նման երկրները եւս չեն կարող խուսափել դրա ազդեցությունից: Եթե սիրիացի քրդերը, իշխանության թուլանալու պատճառով, որոշեն սեփական պետությունը ստեղծել, ապա Թուրքիան փախստականների ճգնաժամից էլ ավելի մեծ ճգնաժամի առաջ կհայտնվի», -կանխատեսում է The Guardian-ը:

http://armenpress.am/arm/news/691683/the-guardian-y-kankhatesum-e-turqiayin-aveli-vat-baner-en-spasvum.html