Նամակ
Հարգելինե’ր, ես ՇԸՐՆԱՔՑԻ եմ… Մենք կարող ենք նույն կրոնին չպատկանել և ձեր հանդեպ էլ որևէ հարկադրանք չունենք: Ուղղակի ես խնդրում եմ, որ դուք ձեր կայքից հանեք հետևյալ նախադասությունը. «Շըրնաքում ապրող թուրքական աշիրեթները ամեն բան խլեցին մեր ձեռքից: Առանց որևէ ղուրուշի մնացինք: Ավելին` նրանք մեզ ստիպեցին հարկեր վճարել` մեր կյանքը պահպանելու համար: Ձեռք գցեցին մեր ամեն ինչին: Մենք շատ զրկանքներ կրեցինք քրդերի պատճառով»:
Էական չէ` այս նախադասությունը ճիշտ է, թե սխալ: Կարևորն այն է, որ թոթափեք ատելությունը…
Հարգանքներով` Մահմուդ
Պատասխան
Հարգելի’ Մահմուդ
Նախ պետք է շեշտել, որ այդ նախադասությունը չի գրվել մեր կայքէջի խմբագրության կողմից: Իսկ որևէ հոդվածում կամ հարցազրույցում կրճատումներ անելը, այս կամ այն նախադասությունը հավելելը կամ հանելը դեմ է ԶԼՄ-ների բարոյական նորմերին: Եթե անգամ մեր կայքէջը համամիտ չէ մեր կայքում ներկայացված հոդվածի կամ խոսքերի հետ, ճիշտ չի լինի դրանցում որևէ ուղղումներ մտցնելը: Սակայն եթե Դուք տեղեկություններ ունեք այն մասին, որ Շըրնաքի քուրդ հասարակության կողմից նման բան չի արվել, և որ հոդվածում նշվածները սուտ կամ սխալ են, խնդրում ենք, որ մեզ էլ տեղեկացնեք: Ձեր «Ճիշտ է, թե սխալ» խոսքից կռահում ենք այդ տեղեկությունների «ճիշտ» լինելու ակնարկը: Եթե որևէ մեկը Ձեր հանդեպ անիրավացի գտնվի, գողություն կամ հանցագործություն անի Ձեր դեմ, այդ դեպքում ատելություն սերմանե՞լ է ոստիկանությանը տվյալ անձի դեմ բողոք ներկայացնելը: Այն դեպքում, երբ փաստ են հայերի նկատմամբ իրագործված անթիվ-անհամար անօրինականությունները և չարագործությունները, այն դեպքում, երբ այդ կատարվածներից և ոչ մեկը դեռ ոչ մի կերպ չի փոխհատուցվել, այն դեպքում, երբ ափսոսանքի նշույլ անգամ չի արտահայտվել, այն մարդը, ով հայտնում է իր ցավի, իր դեմ կատարված անօրինականությունների մասին, մեղավոր և քինախնդի՞ր է դառնում: Հարգելի’ Մահմուդ, մենք դժվարանում ենք ըմբռնել արդարության Ձեր ընկալումը:
Akunq.net
Leave a Reply