Օգոստոսի 12-ին PKK-ն Թունջելի վերանվանված Դերսիմում առեւանգել էր Ժողովրդա-հանրապետական կուսակցության պատգամավոր Հուսեյն Այգունին: Թեեւ 2 օր հետո պատգամավորը ազատ է արձակվել, սակայն փաստն ինքնին ցնցել էր թուրք հասարակությանը: Մինչ այդ PKK-ին հաջողվել է առեւանգել բազմաթիվ կուսակցական գործիչների, այս կամ այն նահանգի կառավարիչների (նրանցից ոմանք մեկ տարի շարունակ որպես պատանդ են պահվում), բայց Թուրքիայի Ազգային մեծ ժողովի պատգամավորի առեւանգումը աննախադեպ էր, ընդ որում` օրը ցերեկով:
Քրդական այս կազմակերպությունը դրանով ցույց էր տալիս, որ ինքը բազմաթիվ շրջաններ է վերահսկում Թուրքիայի արեւելքում եւ հարավարեւելքում, որտեղ տեղակայված 100-հազարանոց թուրքական բանակը խոչնդոտ չէ իր անկաշկանդ գործունության համար: Էլ չենք խոսում վերջին մեկ ամսում PKK-ի Շըրնաքի նահանգը գրավելու համար ձեռնարկած 3, իսկ Ջիզրեի գավառը գրավելու 1 փորձի, ինչպես նաեւ օգոստոսի 20-24-ի կռիվներում 30 թուրք զինծառայողին ոչնչացնելու փաստի մասին, ինչը թուրքական հանրային հեռուստատեսության էկրանից խոստովանեց Ժողովրդա-հանրապետական կուսակցության պատգամավոր Ումիթ Օրանը:
PKK-ն հիմա էլ թիրախ է դարձրել 2002 թ. Թուրքիայում միանձնյա իշխող վարչապետ Էրդողանի Արդարություն եւ բարգավաճում կուսակցության փոխնախագահ Հուսեյն Չելիքին եւ Դիարբեքիրի պատգամավոր Ջումա Իչթենին: Իմանալով այդ մասին` թուրքական հետախուզությունը նախ իրազեկել է Չելիքին եւ Իչթենին, ապա նախազգուշացրել Թուրքիայի բոլոր 81 նահանգի ղեկավարներին ու անվտանգության քաղաքային վարչություններին, համալրելով առեւանգման սպառնալիքի տակ գտնվող գործիչների թիկնապահների շարքերը:
Թուրքական «Աքշամի» վկայությամբ` Դիարբեքիրի պատգամավոր Իչթենն առեւանգման սպառնալիքի առնչությամբ ասել է. «Գիշեր-ցերեկ անդադար աշխատում եմ իմ ընտրատարածքում` Դիարբեքիրում: Դա անհանգստացնում է PKK-ին: Սկզբում թիկնապահ չէի պահանջել, սակայն այս անգամ ձեռքի տակ գտնվող հետախուզական տվյալները վերին աստիճանի լուրջ են: Պետք է մտածել անվտանգության մասին: Չեմ կարող վտանգել ինձ հետ աշխատողների կյանքը: Այդ իսկ պատճառով էլ դիմելու եմ թիկնապահների ծառայությանը»:
Կհաջողվի՞ PKK-ին առեւանգել Էրդողանի կուսակցության փոխնախագահին եւ Դիարբեքիրի պատգամավորին, դժվար է կռահելը: Բայց որ առեւանգման մտադրությունն անգամ թուրքական իշխանություններին ստիպում է ավտանգության անհրաժեշտ միջոցառումներ իրականացնել ընդդեմ PKK-ի, ակնհայտ է: Այդ միջոցառումները կաշկանդվածության նշան են, էլ ավելի են թուլացնում թուրքական պետական իշխանությունների դիրքերը երկրի արեւելյան եւ հարավարեւելյան շրջաններում:
Leave a Reply