Հայազգի աղջկան մերկ լուսանկարած և նրան շանտաժի ենթարկելով ինքնասպանության հասցրած թուրք 
եղբայրներն ազատ են արձակվել, տեղեկացնում է Haberler կայքը:
Ստամբուլի 35-րդ Առաջին ատյանի դատարանը Հայաստանի քաղաքացի Նարինե Մկրտչյանին ինքնասպանության հասցրած երկու եղբայրներին, ովքեր 6 ամիս է կալանավորված էին, ազատ է արձակել դատական երկրորդ նիստի ընթացքում:
Դատական նիստին ներկա է եղել նաև Նարինեի մայրը` Նունե Մկրտչյանը: Իր ցուցմունքում նա նշել է, որ այդ ընթացքում ինքը Ստամբուլում չի եղել և աղջկա հետ հեռախոսով է խոսել: «Ընկերս` Օրհանը, լուսանկարել է ինձ: Նրա եղբայրն այդ նկարներով ինձ շանտաժ է անում, որպեսզի լինեմ հետը: Երբ մերժեցի, ասաց, որ եղբորս կպատմի: Ես այլևս Օրհանին չեմ ուզում»,-մորը պատմել էր Նարինեն:
Դատարանում վկայություն են տվել նաև Նարինեի ընկերուհիները: Նրանցից մեկը` Սիբել Թունան, պատմել է, թե տեղյակ է եղել, որ Բարըշ և Օրհան եղբայրներն ունեցել են Նարինեի «անպատեհ» լուսանկարները: «Սակայն մեղքը 80 տոկոսով եղբայրներինն է, 20 տոկոսով` Նարինե Մկրտչյանի ընտանիքինը: Նարինեն ինձ պատմել է, որ խորթ հայրը նույնպես սեռական բռնության է ենթարկել իրեն»,-ասել է վկան:
Նա նշել է, թե Նարինեն իրեն հայտնել է, որ պատրաստվում է ինքնասպան լինել, ինքն էլ փորձել է համոզել, որ չդիմի այդ քայլին:
Վկաներին լսելուց հետո եղբայրների փաստաբանը միջնորդություն է ներկայացրել` պաշտպանյալներին պայմանական ազատ արձակելու վերաբերյալ, ինչն էլ ընդունվել է դատարանի կողմից: Դատական նիստն այդ որոշումից հետո հետաձգվել է:
Հիշեցնենք, որ 4 տարի առաջ Թուրքիա ներգաղթած Նարինե Մկրտչյանը եղբոր և խորթ հոր հետ անօրինական բնակվել է Ստամուլի Քումքափը թաղամասում: Նա սիրահարվել է թուրք հարևան Օրհան Օքումուշին, ով խոստացել է ամուսնանալ նրա հետ և մերկ լուսանկարել նրան:
Օրհանի եղբայրը` 25-ամյա Բարըշ Օքումուշը նույնպես սպառնացել է Նարինեին` ասելով, որ «եթե իր հետ էլ չլինի, լուսանկարները ցույց կտա աղջկա եղբորը»:
Սակայն, քանի որ Նարինեի ընտանիքն անօրինական է բնակվել Թուրքիայում, ոստիկանության դիմել հնարավոր չի եղել: Աղջիկը փետրվարի 28-ին թույն է խմել և ինքնասպան եղել:
Leave a Reply