Ֆրանսիայի նոր ուսումնական տարում «Հայոց ցեղասպանություն» թեմայի ընդգրկումը միջնակարգ դպրոցի ավարտական դասարանի դասագրքերում անակնկալի է բերել Թուրքիայի քաղաքական շրջանակներին: Մինչդեռ նրանք նախագահական ընտրություններում Նիկոլա Սարկոզիի պարտությունից հետո, ոգեւորված արտգործնախարար Լորան Ֆաբիուսի թուրքամետ հայտարարություններով, մտածում էին Ֆրանսիայի օրակարգից դուրս մղել Հայոց ցեղասպանության ուրացումը քրեականացնող օրինագիծը:
Թուրքիայի աշխարհաքաղաքական դիրքը, որը Եվրոմիությանը հնարավորություն է տալիս ներթափանցելու Մերձավոր եւ Միջին Արեւելք, նախագահ Ասադի վարչակարգի տապալման հարցում ֆրանկո-թուրքական համագործակցությունը, ինչպես նաեւ Սիրիայի առնչությամբ ստանձնած Վաշինգտոնի հանձնակատարի դերը այդ առումով հուսադրող էին Անկարայի համար:
Սակայն Հայոց ցեղասպանության թեմայի ընդգրկումը ֆրանսիական դպրոցական դասագրքերում ի չիք դարձրեց թուրքական հույսերը: Երեկ «Ազգն» անդրադարձավ ընդգրկման հարցին: Նախորդ օրն էլ անդրադարձել էր «Վաթանը»: Ըստ թուրքական թերթի, դասագրքի համապատասխան բաժնում ներկայացված են ցեղասպանության ժամանակագրությունը, հայերի տեղահանության քարտեզը, Թալեաթ փաշա կոչեցյալ մարդասպանի հեռագիրը, բնաջնջման թուրքական մեթոդները, զոհերի թիվը, հրաշքով փրկվածները, հայ որբերի (շուրջ 10 հազար) թուրքական որբանոցներում մահմեդականացումը, ինչպես նաեւ Հայոց ցեղասպանությունը, այսինքն` մարդասպան թուրք հրոսակի գազանությունները պատկերող մի քանի լուսանկարներ:
Ակնհայտ է, որ «Հայոց ցեղասպանության» մուտքը ֆրանսիական դպրոցների կրթական ծրագրեր, ցեղասպանության ուրացումը քրեականացնող օրինագծի հարցում նախագահ Ֆրանսուա Օլանդի հետեւողականության վկայությունն է: Թերեւս դրանով պետք է բացատրել ԵՄ-ի գծով նախարար եւ գլխավոր բանակցող Էգեմեն Բաղըշի շատ բուռն, նույնքան էլ սանձարձակ հակազդեցությունը:
Ահա թե, ըստ «Հյուրիեթի», ինչ է ասել այս չափազանց իմաստուն ու խոհեմ գործիչը. «Ինչպես երեւում է, անհրաժեշտ դասը չի քաղել նա, ով գրավեց իր նախորդի աթոռը, որին վարած սխալ քաղաքականության պատճառով Ֆրանսիայի ժողովուրդը ուղարկել է ձուկ բռնելու: Հիմա ելել պատմության էջերն է խառնում, որ մարդկանց մտքերը պղտորի եւ ատելություն սերմանի նոր սերունդներին: Հուսանք` շուտափույթ հետ կկանգնեն այս սխալից: Ցեղասպանությունները տեղ չունեն Թուրքիայի պատմության մեջ: Ընդհակառակը` դրանց իրագործումը յուրահատուկ է նրանց, ովքեր հանդգնում են մեզ բացատրել ցեղասպանության էությունը: Ցեղասպանությունը իբրեւ երեւույթ խորթ է Թուրքիային: Աշխարհի որ ծայրն էլ գնանք, մենք խաղաղություն եւ սեր ենք տանում: Գաղութատեր չենք եղել եւ ամենուրեք բարեկեցություն ու հանդուրժողականություն ենք տարածել: Խորհուրդ ենք տալիս դասագրքերը ափեղ-ցփեղ գիտելիքներով լցնելու փոխարեն, վերստին ըմբռնեին «ազատության, հավասարության, եղբայրության» մասին իրենց սկզբունքների իմաստը եւ, իբրեւ Մինսկի խմբի համանախագահող երկիր, նպաստեին Ադրբեջանի հետ Հայաստանի հակամարտության կարգավորմանը»:
Leave a Reply