ԱՄՆ Սենատի դեմոկրատ թեկնածուն սատարում է ԼՂ ինքնորոշման իրավունքը

Մասաչուսեթս նահանգից ԱՄՆ Սենատի դեմոկրատ թեկնածու, Հարվարդի համալսարանի իրավագիտության պրոֆեսոր Էլիզաբեթ Ուորենը The Armenian Weekly-ին տված հարցազրույցում խոսել է ամերիկահայ համայնքին առնչվող կարեւորագույն հարցերի, այդ թվում` Հայոց ցեղասպանության ճանաչման գործում արդարության եւ Լեռնային Ղարաբաղի ժողովրդի ինքնորոշման մասին:

Ինչպես փոխանցում է  «Արմենպրես»-ը, պարբերականի հարցին` արդյո՞ք նա աջակցություն կցուցաբերի Թուրքիային ճնշելու հարցում, ինչպես նաեւ ԱՄՆ ներկայացուցիչների պալատի` 2011 թ. դեկտեմբերի ընդունած օրինագծին, որը հորդորում է թուրքական կառավարությանը հարգել իր քրիստոնյա բնակչության ազատ դավանանքի իրավունքները եւ վերադարձնել բռնագրավված քրիստոնեական եկեղեցիներն իրենց օրինական սեփականատերերին, Ուորենը պատասխանել է. «Այո’, ես սատարում եմ այն բորոր ջանքերը, որոնցով կոչ է արվում թուրքական կառավարությանը` վերադարձնել կրոնական ունեցվածքն իրենց օրինական տերերին: Որպես երկիր` մենք հավատում ենք կրոնական ազատությանը թե’ մեր տանը, թե’ ամբողջ աշխարհում: Ես նաեւ գնահատում եմ ամերիկահայության ներդրած ջանքերը, ովքեր հասել են այս հարցի եւ Հայոց ցեղասպանության ճանաչման իրազեկությանը: Եթե մենք չճանաչենք անցյալի վայրագությունները, ուրեմն մենք կանգած ենք ապագայում նույնը կրկնելու ռիսկի առաջ: 1915 թ. 1.5 մլն հայերի սպանդը երբեք չպետք է մոռանանք»: 

Անդրադառնալով Մասաչուսեթս նահանգի Ներկայացուցիչների պալատի ընդունած բանաձեւին, որում ԱՄՆ նախագահին եւ Կոնգրեսին կոչ է արվում սատարել ԼՂ ինքորոշումը եւ անկախությունը, պարբերականը հարց է ուղղել` արդյո՞ք նա կաջակցի Լեռնային Ղարաբաղի անկախության իրավունքին` Ուորենը նշել է. «Այո’, ես սատարում եմ ԼՂ ինքնորոշման իրավունքը: ԵԱՀԿ Մինսկի խմբի եւ Հայաստանի կառավարության ջանքերի շնորհիվ խաղաղ եզրակացության հասնելու հարցում ես հույսեր ունեմ: Արդեն չափազանց շատ կյանքի կորուստներ են եղել»:

http://armenpress.am/arm/news/691425/