Թուրքիայի հայերի սոցիալական օգնության և մշակութային պայքարի միությունը Բաթմանի նահանգում ավերված եկեղեցիների պատճառով դիմել է նահանգապետարան` պահանջելով պաշտպանության տակ առնել դրանք:
Ինչպես տեղեկացնում է Haberler կայքը, դիմումում միության ղեկավար Ազիզ Դաղջըն ուշադրություն է հրավիրել այն հանգամանքի վրա, որ վերջին շրջանում Բաթմանի նահանգում հայկական եկեղեցիները ավերվում են:
«Վերջին օրինակը Սասունի Մարութա սարի Սուրբ Աստվածածին եկեղեցին էր, որն ավերվեց սադրիչների կողմից: Սասունի շրջանի Մեշելի գյուղի հետնամասում գտնվող Պետրոս Առաքյալ եկեղեցին էլ պետք է պաշտպանության տակ առնվի, քանի դեռ չի ավիրվել: Պաշտպանության կարիք ունեն նաև Ռեշմիք գյուղի եկեղեցին, Քոզլուք շրջանի Սուրբ Աստվածածին հայկական եկեղեցին»,- նշել է Դաղջըն:
Նա ասել է, որ չի հավատում այն պնդումներին, թե եկեղեցին քանդվել է գանձ որոնողների կողմից:
«Որպես համայնք հասել ենք մի իրավիճակի, երբ չենք կարողանում աղոթել: Այս եկեղեցիները բոլորն էլ գրանցված են: Լոզանի հաշտության պայմանագրի 42-րդ հոդվածի համաձայն` Թուրքիայի կառավարությունը պարտավոր է փոքրամասնություններին պատկանող եկեղեցիներն ու այլ կրոնական հաստատությունները պաշտպանել: Թուրքիայի Հանրապետությունը պետք է կատարի Լոզանի պայմանագրի այս դրույթը»,-ասել է նա:
Leave a Reply