Կարսի Առաքելոցը բողոքներից հետո սկսել են բացել զբոսաշրջիկների առաջ

Ներկայում Թուրքիայի տարածքում գտնվող Հայաստանի նախկին մայրաքաղաքներից Կարս քաղաքում գտնվող Առաքելոց եկեղեցին զբոսաշրջիկների բողոքներից հետո սկսել է ավելի հաճախ բացվել։

Ինչպես Կարսից տեղեկացնում է NEWS.am-ի թղթակիցը, մզկիթի վերածված հայկական եկեղեցին բաց էր լինում միայն նամազի ժամերին, սակայն վերջին շրջանում տեղացի եւ արտասահմանցի զբոսաշրջիկների բողոքները թուրքական մամուլում հայտնվելուց հետո դրությունը փոքր-ինչ փոխվել է։

NEWS.am-ի թղթակիցը Կարսում նկատել է, որ եկեղեցու մոտ հավաքված զբոսաշրջիկներ տեսնող երեխաները արագ վազում եւ կանչում են «մզկիթի» իմամին, ով գալիս եւ դուռը բացում է զբոսաշրջիկների առաջ։ Իսկ երեխաները մոտենում են զբոսաշրջիկներին եւ գումար ուզում` դուռը բացելու համար «աշխատանք» կատարելու դիմաց։  Զբոսաշրջիկներից շատերը չեն ընդդիմանում եւ երեխաներին մանրադրամներ են տալիս։

Հայոց Բագրատունիների օրոք, 10-րդ դարում կառուցված Կարսի առաքելոց եկեղեցին պատմության ընթացքում ժամանակ առ ժամանակ եկեղեցուց վերածվել է մզկիթի: Վերջին վերանորոգումից հետո էլ խոակցություն կար, թե այն կարող է դառնալ եկեղեցի կամ թանգարան, սակայն այն, ի վերջո, վերածվեց մզկիթի` չնայած պատերի վրա առկա են քանդակված խաչեր եւ առաքյալների պատկերները:

2 տարի առաջ, երբ Վանի Աղթամար կղզու Սուրբ Խաչ եկեղեցում թույլատրվեց պատարագ իրականացնել, Կարս ժամանեցին մեծ թվով զբասաշրջիկներ, ովքեր այնտեղից մեկնեցին Վան։  Զբոսաշրջիկների նման հոսք տեսած Կարսի տուրիզմի ներկայացուցիչները փորձել էին դիմել Անկարային՝ Կարսի Առաքելոցում եւս տարին մեկ անգամ պատարագ իրականացնելու թույլտվություն ստանալ, սակայն կտրուկ մերժում էին ստացել։ 

http://news.am/arm/news/118595.html