Որտեղից ես եմ. Սերժ Թանկյան

Աշխարհահռչակ ռոք երաժիշտ Սերժ Թանկյանը հարցազրույց է տվել KCET հեռուստաալիքին, որի ընթացքում խոսել է իր հայկական արմատների և Լոս Անջելեսի հայ համայնքի իր վրա ունեցած ազդեցության մասին:

«Ծնողներս և ես ԱՄՆ եկանք 1975 թ., Լիբանանի քաղաքացիական պատերազմի սկզբին: Մեծ թվով հայեր կան, ովքեր նույն ժամանակում լքեցին Լիբանանը և մեկնեցին ԱՄՆ կամ այլ վայրեր: Այսպիսով ես մեծացել եմ Լոս Անջելեսի հայ համայնքում, հաճախել եմ հայկական դպրոց: Ես կարծում եմ, որ հայ համայնքում մեծանալը և ժողովրդավարական երկրում բոլորին լավ հայտնի Ցեղասպանության ժխտման կեղծավորությունը տեսնելը, ինձ ստիպեցին այլ բաներ ևս հասկանալ, ինչն էլ ինձ ակտիվիստ դարձրեց: Ես ինքնս ինձ ասացի` «Որքան բաներ կան, որոնք մերժվում են քաղաքական կամ տնտեսական շահերի պատճառով և գաղտնի են պահվում հասարակությունից»:

Այդ ամենն ինձ շատ այլ հարցերի նկատմամբ զգայուն դարձրեց` լինի դա բնապահպանական հարց, մարդու իրավունքների կամ անհավասարությանը և անարդարությանը վերաբերող հարցեր:

Իմ կյանքում արդարություն ստեղծելու համար ուղիներ փնտրելը շատ մեծ բան է, քանի որ ես կարծում եմ, որ դա նոր գեղեցկություն է տալիս աշխարհին: Նոր մշակույթ»,- նշել է Թանկյանը:

Խոսելով ԱՄՆ-ի հայ համայնքի մասին` Սերժ Թանկյանը նշել է, որ կան որոշ բաներ որոնք միավորում են աշխարհի բոլոր հայերին: Դրանցից մեկը Հայոց Ցեղասպանությունն է:

«Բացի դրանից` կերակուրը, երաժշտությունը, մշակույթը, տոները, կենսակերպը»,-նշել է ռոք երաժիշտը:

http://haynews.am/hy/1346055499