Ստամբուլում ալևիների տների վրա նշաններ են արվել

Ստամբուլի Քարթալի շրջանում անհայտ անձիք կապույտ ներկով տարօրինակ նշաններ են թողել ալևիներին պատկանող 14 տների դռների վրա: Ինչպես հաղորդում է «Արմենպրես»-ը, այս մասին տեղեկացնում է թուրքական Taraf պարբերականը:

Հետաքրքրական է այն փաստը, որ բոլոր տների բնակիչներն էլ ծագումով Սըվազից (Սեբաստիա) են, ընդ որում` նրանցից 12–ը` միևնույն գյուղից: Քարթալի ոստիկանությունը արդեն միջադեպի առնչությամբ հետաքննություն է սկսել: Անվտանգության մարմինները նշել են, որ տների վրա նշան անող մարդիկ լավատեղյակ են թե’ թաղամասից, թե’ դրա բնակիչներից:

Նմանօրինակ միջադեպը թուրքական իրականությունում առաջինը չէ: Ավելի վաղ անհայտ անձիք նշաններ էին արել և համարակալել էին Իզմիրի Բուրջա շրջանում բնակվող ալևիների տները: Սա մեծ խուճապ էր առաջացրել տեղացիների շրջանում, քանի որ նախկինում Մարաշում և Սըվազում նման նշաններ անելուց հետո այդ տների բնակիչները սպանվել էին:

http://armenpress.am/arm/news/691270/stambulum-alevineri-tneri-vra-nshanner-en-arvel.html