Օգոստոսի 26-ին տեղի ունեցավ Քընալը կղզու Կազդուրման կայանի փակման արարողությունը (մանկական ճամբար): Հանդիսությանը ներկա էին նաև Պատրիարքական Ընդհանուր Փոխանորդ Գերաշնորհ Տ. Արամ Արքեպիսկոպոս Աթեշյանը, Գերպ. Տ. Թաթուլ Ծ. Վրդ. Անուշյանը, Քընալը կղզու թաղական խորհրդի անդաներ:
Հանդիսության ժամանակ կազդուրման կայանի սաները փոքրիկ պարային համարներ և երգեր էին պատրաստել ներկաների համար:
Գերաշնորհ Տ. Արամ Արքեպիսկոպոս Աթեշյանը նվերներ և շնորհակալագրեր հանձնեց ճամբարի ուսուցչական և ղեկավար կազմին, ովքեր ողջ ամառվա ընթացքում կազմակերպել էին երեխաների հանգիստն ու ուսումնական պրոցեսը:
Ճամբարի փակման արարողության ժամանակ ելույթ ունեցավ նաև Գերաշնորհ Տ. Արամ Արքեպիսկոպոս Աթեշյանը, ով շեշտեց ճամբարի կարևորությունը հայ երեխաների հայեցի դաստիարակության համար. երեխաներն այստեղ շփվում են իրենց ազգակիցների, կրոնակիցների հետ, ձեռք են բերում նոր հայ ընկերներ: Ա. Աթեշյանը կոչ արեց ծնողներին` սերմանել երեխաների մեջ սեր առ մայրենի լեզուն, հայկական մշակույթը, խուսափել խառնամուսնություններից, որոնք վերջին շրջանում մեծ թիվ են կազմում:
Հիշենենք, որ Քընալը կղզում պոլսահայ երեխաների համար կազմակերպվող ամենամյա ճամբարը Պոլսո պատրիարքարանի հրավերով այս տարի մեկ շաբաթով հյուրընկալել էր նաև Գավառի մանկատան սաներին:
Անահիտ Քարտաշյան
Akunq.net
Leave a Reply