Իսրայելի տեղեկատվության եւ սփյուռքի նախարար Յուլի Էդելշտեյնն օգոստոսի 24-ին այցելել է Հայոց ցեղասպանության զոհերի հուշահամալիր` Ծիծեռնակաբերդ: Ինչպես փոխանցում է «Արմենպրես»-ը, նախարարը ծաղկեպսակ է դրել Մեծ եղեռնի զոհերի հուշարձանին, որից հետո պատվիրակության անդամները ծաղիկներ են դրել Մեծ Եղեռնի զոհերի հիշատակը հավերժացնող անմար կրակի մոտ եւ մեկ րոպե լռությամբ հարգել Հայոց ցեղասպանության անմեղ զոհերի հիշատակը:
Էդելշտեյնը այցելել է նաեւ Հայոց ցեղասպանության թանգարան, որտեղ թանգարան-ինստիտուտի տնօրեն Հայկ Դեմոյանը նրան ծանոթացրել է Հայ գրքի տպագրության 500-ամյակի եւ ՅՈՒՆԵՍԿՕ-ի կողմից Երեւանը Համաշխարհային գրքի մայրաքաղաք հռչակելու կապակցությամբ բացված «Գիրքը որպես ցեղասպանության վկա» խորագիրը կրող ժամանակավոր ցուցադրությանը: Նախարարը գրառում է թողել թանգարանի պաշտոնական այցելությունների հուշամատյանում, որտեղ մասնավորապես ասված է. «Մեր ժողովուրդների միջեւ կան շատ ընդհանրություններ ու նման պատմական դրվագներ: Իսրայելում որեւէ մեկը չի ժխտում Հայոց ցեղասպանության փաստը»:
Իսրայելը պատկանում է այն պետությունների շարքին, որոնք չեն ճանաչել Հայոց ցեղասպանությունը: Մինչդեռ Մեծ Եղեռնը որպես ցեղասպանություն ճանաչել եւ դատապարտել են աշխարհի ավելի քան 2 տասնյակ պետություններ, ԱՄՆ 40-ից ավելի նահանգներ, տարբեր քաղաքների ադմինիստրատիվ կառույցներ, միջազգային կազմակերպություններ:
Leave a Reply