Թուրքական հերթական վայրագության զոհը Մարութա սարի Սուրբ Աստվածածին եկեղեցին է

 Տեսանյութը դիտել այս հասցեով http://www.youtube.com/watch?v=hCl7P143p3Y&feature=player_embedded

Օրերս մեր եթերում տեղեկացրել էինք Անիում վերականգնողական աշխատանքների մասին։ Միջազգային հանրության ճնշումով իրականացվող այդ ծրագիրը թուրքական իշխանությունները փորձեցին հերթական անգամ դարձնել քարոզչական զենք։ Այս օրերին արդեն տեղեկատվություն է ստացվում հայկական հուշարձանների ավերման մասին։ Զոհը այս դեպքում դեռ մի քանի օր առաջ Սասունի Մարութա սարում հարյուրավոր հայերի համախմբած Սուրբ Աստվածածին եկեղեցին է:

«Տարիներ առաջ դարձյալ քանդել էին: Առաջին դեպքը չէ: Սա մշակութային ցեղասպանություն է Արեւմտյան Հայաստանում Թուրքիո իշխանությունների կողմից»,- նշում է Արեւմտահայոց հարցերի ուսումնաասիրության կենտրոնի տնօրեն Հայկազուն Ալվրցյանը:

Նա անկեղծանում է` թուրքական հերթական վայրագության մասին լուրերն արդեն սովորական են դարձել: Այն, որ այս անգամ քանդել են Սասունի շրջանի Մարաթուկ սարի Բարձր Սուրբ Աստվածածին եկեղեցուց մնացած փոքրիկ մատուռը, նրան տեղեկացրել էին դեպքի օրը, սասունցի բարեկամները։ Ինչպես եւ նախորդ անգամ` պատճառաբանությունը նույնն է՝ կիսավեր եկեղեցին քանդել են ոսկի որոնելու պատճառով: «Անհեթեթ է ենթադրել, որ ոսկի որոնողներն են քանդել եկեղեցին: Առավել եւս, որ նման դեպքերում քանդում են հիմքերը, հատակն են քանդում, իսկ այս դեպքում քանդել են տանիքը»:

Թուրքական իշխանությունների՝ Արեւմտյան Հայաստանում հայկական մշակույթի մասին խոսող վերջին մնացորդներից` կիսավեր եկեղեցիներից ազատվելու քաղաքականության ծանոթ մասնագետն այլ կարծիք ունի: Եկեղեցու ընտրությունն էլ պատահական չէ: Ամեն տարի հուլիսին Մարութա սարի ճամփան բռնած հայ ուխտավորների նկատելի ոգեւորվածությունը չէր կարող անարձագանք մնալ:

«Սա արդեն հասկանալի քայլ է: Միտումնավոր քանդել են տանիքը, որ աստիճանաբար անձրեւից վերանա նաեւ վիթխարի եկեղեցուց մնացած այս վիթխարի մատուռը»,- ասում է Հայկազուն Ալվրցյանը:

Պոլսում գործող Սասունի հայերի միության նախագահ Ազիզ Դաղջըի միջնորդությամբ եկեղեցին ավերողների դեմ դատական գործ է հարուցել Սասունի հանրապետական դատախազությունում: Բաթմանի թանգարանի տնօրինության ներկայացուցիչներից եւ հնագետներից բաղկացած 15 հոգանոց խումբն ուսումնասիրություններ է կատարել Մարութա լեռան վրա գտնվող եկեղեցում: 

«Սասունի հայերի միությունը դատական գործ է հարուցել, եւ ուղղակի լուսանկարներով, որոնք արվել են ուխտագնացության ժամանակ, պահանջում են անմիջապես վերականգնել եկեղեցին»,- ասում է Ազիզ Դաղջը:

Միությունը պահանջել է նաեւ պահպանության տակ առնել հայկական նշանավոր կառույցները, մինչդեռ Դիարբեքիրի մշակութային եւ բնական հարստությունների պահպանման շրջանային խորհրդի տնօրեն Մեհրիբան Քարաասլանի` դիտողի կարգավիճակն արդեն խոսում է այն մասին, որ Թուրքիան չի հանդուրժում, որ ամեն տարի եկեղեցին իր շուրջն է համախմբում հարյուրավոր հայերի աշխարհի տարբեր անկյուններից եւ այս կերպ փորձում է վերջ տալ եկեղեցում կատարվող կրոնական արողություններին: 

http://www.yerkirmedia.am/?act=news&lan=hy&id=9203#video