«Ի՞նչ եք ուզում եկեղեցու տանիքից»

Ստամբուլում գործող Սասունի հայերի միության նախագահ Ազիզ Դաղջըն Բաթման նահանգի Սասուն գավառի Մարութա լեռան գագաթին գտնվող Սուրբ Մարիամ Աստվածածին եկեղեցին ավերողների դեմ դատական գործ է հարուցել Սասունի հանրապետական դատախազությունում:

Batmancagdas.com կայքի փոխանցմամբ Դաղջըն նշել է. «Մեկ ամիս առաջ եկեղեցու տանիքը կանգուն էր: Սակայն երբ շրջանի հովիվները լուր տվեցին այս պատմական եկեղեցու տանիքի ավերման մասին, մի պատվիրակության հետ միասին պահանջեցինք, որ եկեղեցին ուսումնասիրվի»:

Բիթլիսի (Բաղեշ-Ակունքի խմբ.), Բաթմանի, Մուշի, Վանի, Ստամբուլի և մյուս բոլոր նահանգների, գավառների և գյուղերի հայերի, ինչպես նաև` Սասուն գավառի գյուղերի հայության սոցիալական փոխօգնության և մշակութային համերաշխության միության նախագահ Ազիզ Դաղջըն հայտնել է, որ Մարութա լեռան վրա գտնվող հայկական Սուրբ Մարիամ Աստվածածին մայր եկեղեցին ավերվել է անհայտ անձանց կողմից: Սասունի հանրապետական դատախազությունում դատական գործ հարուցած Դաղջըն ասել է. «Չեմ կարողանում հասկանալ, թե նրանք ինչ են ուզել մեր եկեղեցու տանիքից: Այս տարվա հուլիսի 29-ին եկեղեցու սուրբ օրվա կապակցությամբ Ստամբուլից և զանազան նահանգներից ժամանած հայկական համայնքի ներկայացուցիչները մատաղ արեցին այստեղ` նշելով եկեղեցու տոնը: Բացի այդ` կատարեցինք մեր կրոնական արարողությունները: Սակայն որոշ ժամանակ անց Մարութա լեռան և շրջակայքի հովիվներից լուր ստացանք, թե եկեղեցու տանիքը լիովին ավերվել է: Որոշ անձինք դա արել են զուտ նրա համար, որ հայկական համայնքն այլևս կրոնական արարողություններ չանի այստեղ»:

Միության նախագահ Դաղջըն հայտնելով, թե իրենք հիշյալ լուրը ճշտելու նպատակով Բաթմանի թանգարանի տնօրինության ներկայացուցիչներից և որոշ հնագետներից բաղկացած 15 հոգանոց խմբով ուսումնասիրություններ են արել Մարութա լեռան վրա գտնվող եկեղեցում, ասել է. «Մեզ մոտ լուսանկարներ և տեսագրություններ կան առ այն, որ սույն պատմական եկեղեցին կանգուն է եղել: Մեր ձեռքի տակ է նաև մի լուսանկար, որը հաստատում է եկեղեցու տանիքի կանգուն եղած լինելու փաստը: Մենք պահանջում ենք, որպեսզի գլխավոր դամբարանի ծածկը և եկեղեցու բոլոր ավերված հատվածներն ուսումնասիրվեն Սասունի հանրապետական դատախազության կողմից, և հնարավորինս շուտ բացահայտվի եկեղեցին ավիրած անձանց ինքնությունը: Պահանջում ենք, որ այդ նպատակով ուսումնասիրվեն 2012 թ. հուլիսի 29-ից մինչև օգոստոսի 21-ը կատարված այն տեսագրությունները, որ հեռվից արվել են Մարութա լեռան վրա` անվտանգության նկատառումներով: Պահանջում ենք նաև, որ պահպանության տակ առնվեն մեր նշանավոր կառույցները: Օրվա լույսի պես պարզ է, որ Թուրքիայի մշակույթի և զբոսաշրջության նախարարությունը, ինչպես նաև` Դիարբեքիրի մշակութային և բնական հարստությունների պահպանման շրջանային խորհրդի տնօրեն Մեհրիբան Քարաասլանը դիտողի կարգավիճակում են միայն»:

Akunq.net