Նախիջեւանի բնակչության կեսից ավելին հեռացել է. ադրբեջանցի քաղաքական գործիչ

Նախիջեւանի Ինքնավար հանրապետությունում առկա իրավիճակն աստիճանաբար Ադրբեջանի համար վերածվում է սպառնալիքի: Այս մասին, ինչպես հաղորդում է «Արմենպրես»–ը, «Ենի Մուսավաթ» թերթի հետ զրույցում հայտարարել է ադրբեջանցի քաղաքական գործիչ Իբրահիմ Իբրահիմլին: Նրա խոսքով` տարածաշրջանը տեղացի բնակչությունից ազատելու, եւ այն արտասահմանցի քրդերով բնակեցնելու հատուկ ծրագիր գոյություն ունի:

Իբրահիմլին ասել է, որ Նախիջեւանը վաղուց վերածվել է Ադրբեջանի իշխանության քաղաքական լաբորատորիայի, Գուանտանամոյի նման բանտի, մռայլ կղզու: «Այս ամենը հանգեցրել է նրան, որ 450 հազար բնակիչներից նվազագույնը 200 հազարը լքել են Նախիջեւանի ինքնավար հանրապետության տարածքը եւ այժմ բնակվում են Թուրքիայում, Բաքվում, Ռուսաստանում: Նրանց փոխարեն Նախիջեւանում բնակեցվում են Իրաքից, Սիրիայից եւ Իրանից եկած Քրդստանի աշխատավորական կուսակցության (PKK) համակիրները: Ավելին` Նախիջեւանում անգամ նշում են PKK-ի հիմնադրման 20-ամյակը: Այս ամենը խիստ տագնապալի միտում ունի: Նախիջեւանում PKK-ի հիմնավորվելու փաստը, որտեղ նա կարող է ազատորեն գործել, շատ լուրջ սպառնալիք է»,-եզրահանգել է Իբրահիմլին:

Քրդստանի աշխատավորական կուսակցությունը 1980-ական թվականներից Թուրքիայում զինված պայքար է տանում քրդական ինքնավարություն ստեղծելու համար: Թուրքական ԶԼՄ-ների գնահատականներով, մինչ այժմ այդ պայքարի պատճառով 40 հազարից ավելի մարդ է սպանվել: Թուրքիան PKK-ն հայտարարել է ահաբեկչական կազմակերպություն:

http://armenpress.am/arm/news/691098/nakhijevani-bnakchutyan-kesic-avelin-heracel-e-adrbejanci.html