Թուրքիայի արտգործնախարար Ահմեդ Դավութօղլուն հայտարարել է, որ Հայաստանի և Ադրբեջանի միջև առկա Լեռնային Ղարաբաղի հակամարտությունը «խոչընդոտ» է Հարավային Կովկասի կայունության ճանապարհին: Այս մասին հայտնում է News-ը:
Դավութօղլուն խոսել է օգոստոսի 23-ին Բիշքեկում կայանալիք թյուրքալեզու երկրների համագործակցության խորհրդի գագաթնաժողովի շրջանակում արտգործնախարարների խորհրդի հետ հանդիպման ժամանակ:
Դավութօղլուն քննադատել է Լեռնային Ղարաբաղի հարցի շուրջ հակամարտությունում «հայկական կողմի ոչ կառուցողական դիրքորոշումը»: «Լեռնային Ղարաբաղի և Ադրբեջանի օկուպացված այլ տարածքների ազատագրումը մնում է մեր արտաքին քաղաքականության գլխավոր ուղղությունը, և այսուհետ մենք աշխատելու ենք այդ ուղղությամբ: Մենք բողոքում ենք Ադրբեջանի տարածքների 20 տոկոսի օկուպացման և մեր ադրբեջանցի եղբայրներին իրենց հողերից վտարման դեմ: 2 տասնամյակ շարունակվող անհաջող բանակցությունների առնչությամբ լրջորեն մտահոգված ենք: Դժվար կլինի Հարավային Կովկասում և Մերձավոր Արևելքում խաղաղության և կայունության հասնել, քանի դեռ Լեռնային Ղարաբաղի հարցը խաղաղությամբ չի լուծվել հօգուտ Ադրբեջանի տարածքային ամբողջականության»,- ասել է Դավութօղլուն:
Դավութօղլուն նշել է, որ Լեռնային Ղարաբաղի հակամարտությունը պետք է լուծվի «միջազգային իրավունքի նորմերի և սկզբունքների, ինչպես նաև Ադրբեջանի տարածքային ամբողջականության շրջանակում»:
Leave a Reply