Հայոց ցեղասպանության ժամանակ, մզկիթի մինարեից բարձր լինելու պատճառաբանությամբ, հրանոթի զարկով քանդված Դիարբեքիրի Սուրբ Կիրակոս հայկական եկեղեցու զանգակատան զանգին փոխարինելու համար Մոսկվայում պատրաստված զանգն արդեն բերվել է Դիարբեքիր: 100 կգ ծանրություն ունեցող սույն բրոնզե զանգը 97 տարի անց` այս տարվա նոյեմբերի 4-ին, նախատեսվող պատարագի ժամանակ դարձյալ կղողանջի հայության համար:
Այդ մասին հաղորդում է «Դողան» լրատվական գործակալությունը: Աղբյուրի փոխանցմամբ` հայերի համար մեծ նշանակություն ունեցող հիշյալ եկեղեցին` Սուրբ Կիրակոսը, վերականգնելու համար Դիարբեքիրի քաղաքապետարանը 1 միլիոնի չափով գումար էր տրամադրել:
Ավելի վաղ Պոլսո հայոց պատրիարքության պատրիարքական ընդհանուր փոխանորդ, արքեպիսկոպոս Արամ Աթեշյանն «Ակունք»-ին տված բացառիկ հարցազրույցում հայտնել էր, որ այս տարվա նոյեմբերի 4-ին կկատարվի Սուրբ Կիրակոսի երկրորդ պաշտոնական բացումը, քանի որ ամբողջապես կվերաբացվի վանական համալիրը: Մինչ այդ կվերակառուցվի համալիրի պատմական զանգակատունը, որի զանգը պատրաստվել է Մոսկվայում: Ներկայում վերականգնվում են Սուրբ Կիրակոսի քահանայատունը և թաղային խորհրդի սենյակները, իսկ մատուռը վերակառուցվում է, քանի որ այն հրկիզված է եղել:
Akunq.net
Leave a Reply