Վերջին օրերին Թուրքիայում դարձյալ ակտիվացել են Թուրքիայի Հանրապետության հիմնադիր Մուսթաֆա Քեմալ Աթաթուրքի` հայ կամ քուրդ լինելու մասին տեղեկությունները:
Նման խոսակցությունների պատճառ են դարձել այն փաստարկները, որ Աթաթուրքը ծնվել է ոչ թե Սալոնիկում, այլ Մալաթիայում, որտեղ ազգությամբ հայերն ու քրդերն են գերակշռում:
Թուրքական Radikal-ի հոդվածագիր Օրհան Քեմալ Ջենգիզը թերթի իր այսօրվա սյունակում անդրադարձել է այդ խոսակցություններին:
«Մենք գրեթե անցյալում ոչինչ թողնելով առաջ շարժվել չկարողացած մի երկիր ենք: Անցյալում տեղի ունեցած իրադարձություններին անկեղծորեն նայել, ցավերը սգալ չկարողացող, սակայն, որքան էլ ցավոտ լինի` իրականության ցավին դիմանալու ուժ ունենալ է պետք: Մենք նախընտրել ենք մոռանալ մեր պատմության մի մեծ մասը: Մեր ուսերին այդ բեռն այնքան է ծանրացել, որ այսօր այդ ծանրության պատճառով մեր ոչ մի խնդիրը լուծել չենք կարողանում»,- գրել է Քեմալ Ջենգիզը:
Նա նշել է, որ պարբերաբար «աջ ու ձախ նման տեղեկություններ են դուրս հորդում», սակայն իրենք չեն կարողանում խիզախությամբ նայել դրանց. Ինչպես, օրինակ, չեն կարողացել հեշտությամբ ընդունել, որ Չանաքքալեի պատերազմի ընթացքում հայազգի սպա է հերոսացել` Սարգիս Թորոսյանը:
«Այսինքն` երբ մի կողմում իթթիհադականները հայերին կոտորում էին, մի հայ սպա պայքարում էր իր հայրենիքի համար: Իհարկե, մեր պատմության գրքերից որևէ մեկում Թորոսյանի անունն անգամ չի անցնում, քանի որ երկիրը պաշտպանելու համար կյանքը մեջտեղ բերած հայ սպայի պատմությունը մեզ անհանգստացնում է ու հիշեցնում մեր մեջքի բեռի մասին:
Անդրադառնալով խոսակցություններին, թե Աթաթուրքը ոչ թե Սալոնիկում, այլ Մալաթիայում է ծնվել, Ջենգիզը գրում է. «Այդ լուրը կարող է ճիշտ, բայց կարող է նաև սխալ լինել: Մեր պաշտոնական պատմության` անհավատալի ստելու հատկության պատճառով շատ հավանական է, որ Աթաթուրքի` Սալոնիկում ծնվելու մասին տեղեկությունները նույնպես հորինված են եղել»:
Հոդվածագիրն իր ասածն ապացուցելու համար հիշեցնում է, որ մինչև վերջերս քրդերի գոյությունը հերքելու համար ստեր են հորինվել: Այսօր նրանց գոյությունն ընդունում են, սակայն նրանց հավասար իրավունքներ չեն տալիս։ Անգամ հրաժարվում են նրանց` մայրենի լեզվով խոսելու իրավունքը ճանաչել:
«Մենք կարիք ունենք մեզ և մեր պատմությանը անկեղծորեն նայելու: Այդ ժամանակ տեսնելու ենք, որ հայ սպայի` Չանաքքալեյում մղած պայքարը, Աթաթուրքին, քուրդ ապստամբներին ընկալելու ենք այնպես, ինչպես կան, և մեր ուսի բեռը մի կողմ թողնելով` առաջ ենք շարժվելու»,-եզրափակել է նա:
http://tert.am/am/news/2012/08/20/ataturk/
Leave a Reply