Թուրքիայի իշխող Արդարություն եւ զարգացում կուսակցությունը կանգնած է փոփոխությունների շեմին, եւ սեպտեմբերի 30-ին կայանալիք կուսակցության համագումարը կլինի պատմական: Այս մասին օգոստոսի 20-ին լրագրողների հետ հանդիպմանը հայտարարեց ՀՀ Գիտությունների ազգային ակադեմիայի արեւելագիտության ինստիտուտի ավագ գիտաշխատող Վահրամ Տեր-Մաթեւոսյանը:
«Պատմական է, քանի որ կուսակցությունը Թուրքիայում որոշակի սահմանափակումներ է մտցրել, թե իշխող կուսակցության նախագահը քանի՞ անգամ կարող է ընտրվել նախագահ, իսկ անդամները՝ պատգամավորներ: Այսինքն՝ կուսակցության կորիզը փոփոխության է ենթարկվում, եւ նրանք, ովքեր երեք անգամ հաղթահարել են ընտրությունները, այժմ պետք է փոփոխվեն, եւ այս հարցը լուրջ խնդիրներ է առաջացրել կուսակցության ներսում»,-ասաց նա:
Ըստ այդմ` կուսակցության նախագահ Ռ. Էրդողանը վերջին անգամ կարող է ընտրվել կուսակցության առաջնորդ, նաեւ յոթ տասնյակից ավել պատգամավորներ չեն կարող մասնակցել 2015 թ. խորհրդարանական ընտրություններին, այդ իսկ պատճառով էլ իրենց բողոքն են արտահայտում կուսակցության կանոնադրության դեմ:
Ըստ փորձագետի` Էրդողանը նման քայլերով նպատակ ունի կուսակցությունը զերծ պահել լճացումից եւ չկրկնել իր նախկինների փորձը: «Շատերը սպասում են, որ գալիք համագումարում Էրդողանը հայտարարություն կանի իր քաղաքական ապագայի վերաբերյալ` ցանկանո՞ւմ է 2015 թ. առաջադրվել նախագահական ընտրություններում, թե ոչ»,- ասաց նա` հավելելով, որ Էրդողանն ուզում է առաջադրվել նախագահի պաշտոնում, սակայն նույն պաշտոնին կարող է նաեւ առաջադրվել Գյուլը, եւ հարց է առաջանում, թե ո՞ւմ հետեւից պետք է գնալ:
Ինչ վերաբերում է կուսակցության դիրքորոշմանը՝ կապված հայ-թուրքական հարաբերությունների հետ, Վահրամ Տեր-Մաթեւոսյանը առանձնացրեց տեսակետների երեք խմբավորում: Ըստ այդմ` ստատուս-քվոյի պահպանման կողմնակիցներ, ովքեր պնդում են, որ չվավերացված վիճակում արձանագրությունները գործում են Թուրքիայի օգտին, երկրորդ խումբը կարծում է, որ չվավերացված արձանագրությունները խարան են Թուրքիայի ճակատին, ու պետք է բացվի հայ-թուրքական սահմանը, երրորդ խումբը հավաքված է Ահմեդ Դավութօղլուի հայցեկարգի շուրջ` 2015 թ. ընդառաջ ծավալել հանրային դիսկուրս:
Leave a Reply