Պոլսահայ որոշ կառույցներ վտանգավոր խաղեր են խաղում Թուրքիո կառավարության հետ

Սիրիայի հայերի խնդիրն ուռճացվել և դարձել է միջազգային քաղաքականության խաղաքարտ:

Սակայն այս գործում սիրիահայերը ոչ մի մեղք չունեն: Ստամբուլահայ և հայաստանյան մամուլում հաղորդագրություն է տարածվել, որ պոլսահյությունը պատրաստ է աջակցել սիրիահայությանը:

Սա բնական է և ընդունելի, թեև այդ պատրաստակամությունը կարելի էր և առանց հայտարարության հավաստել:

 Սակայն վտանգավոր է և տեղին չէ, երբ պոլսահայ կառույցների ղեկավարները ցանկանում են սիրիահայերին ընդունել Ստամբուլում և տեղում օգնություն ցուցաբերել:

ԱԳՈՍ պարբերականի փոխանցմամբ` Բաքըրքյոյի Սուրբ Ծնունդ Աստվածածին եկեղեցու հիմնադրամի ղեկավար Մեսութ Օզդեմիրը նշել է, որ իրենց հնարավորությունները սահմանափակ են և կառավարության ու պետության աջակցությամբ կարող են հայերին տեղավորել Ստամբուլում և բոլոր կարիքները հոգալ: Մի՞թե կարելի է նման հայտարարություն անել: Սա անուղղակի կոչ է թուրքական իշխանություններին (երևի այնտեղից էլ հուշել են ), որ պետական կառույցների միջոցով հիմա էլ Ստամբուլում ստեղծեն սիրիահայերի համար փախստականների ճամաբարներ:

Եթե անգամ մեկ տասնյակ հայ ընտանիք Սիրիայից որպես փախստական հայտնվի Ստամբուլում և մեկ լիրայի սնունդ կամ այլ կարգի օգնություն ստանա թուրքական պետական կառույցներից, ապա վստահ ենք, որ հաջորդ օրը համաշխարհային մամուլը կթմբկահարի, որ Թուրքիան աջակցում է սիրահայերին և անգամ ապաստան է տվել նրանց Ստամբուլում:

Սա թուրքական քարոզչական մեքենայի երազանքն է: Սակայն սիրիահայերը լավ ծանոթ են թուրքական մեթոդներին և ոչ մի սիրիահայ ընտանիք չի հայտնվի Ստամբուլում:

20.08.12 

Արմեն Արազ

http://www.armweeklynews.am/awn/ms12/ms_1008.htm